da Maria Cristina Derungs-Bartolomei
Ils carstgauns tschentan bia damondas entuorn Diu ed entuorn Jesus. Quei ei bien. Sco ils magisters rabbinics muossan, eis ei fetg impurtont da far damondas, per tuccar la noda. E tuttina, ils schemas stretgs dellas damondas lubeschan savens buca agl adressat da communicar a nus quei ch’el less dir. Cheu denton semida il pugn de vesta. Ussa ei Jesus quel che damonda nus: «Tgi sun jeu per tei?». Tuts han il basegns profund da sesincerar dad esser buca mo «enconuschi» en moda exteriura, mobein «renconuschi» en lur identitad autentica, enteifer ina relaziun viva e profunda.
A Cesarea de Filippi, il pli lunsch naven da Jerusalem e dal Tempel, en ina tiara habitada oravontut da pagauns e jasters, vegn Jesus renconuschius: in ver carstgaun (il Fegl dil carstgaun) ch’ei Messias e Fegl de Diu. La damonda de Jesus ei adressada a tuts. Sulet Pieder rispunda, mo sco sch’el tschaffass lur cardientscha aunc pauc sviluppada e dess a quella ils dretgs plaids, curascha e vusch per s’exprimer. «Fortificar ils frars» ei il mandat de Jesus a Simon Pieder (Lc 22,32), convertius suenter il tradiment. La cardientscha de Pieder, buca sia persuna, ei il grep sil qual la baselgia pusa per vegnir baghegiada sulettamein sin Jesus Christus sco unic fundament (1 Cor 3,11).
Mt 16,13–20
13Jesus ei arrivaus ella cuntrada da Cesarea Filippi. Cheu ha el dumandau ses giuvnals: Tgi di la glieud ch’il Fegl dil carstgaun seigi? 14Els han rispundiu: Ils ins dian ch’el seigi Gion Battesta, auters Elia, e puspei auters Jeremia ni in dils profets. 15E vus, di el ad els, tgi scheis uss che jeu seigi? 16Cheu rispunda Simon Pieder e di: Ti eis il Cristus, il Fegl dil Diu vivent. 17E Jesus dat ad el per risposta: Beaus eis ti, Simon, fegl da Jona, pertgei buca carn e saung han revelau quei a ti, mobein miu Bab en tschiel. 18E jeu ditgel a ti: Ti eis Pieder (quei vul dir grep), e sin quei grep vi jeu baghegiar mia Baselgia, e las portas digl uffiern pon buca resister ad ella. 19Jeu vi dar a ti las clavs dil reginavel da tschiel: Quei che ti ligias sin tiara, seigi ligiau era en tschiel, e quei che ti sligias sin tiara, seigi sligiau era en tschiel. 20Lu ha el cumandau als giuvnals da dir a negin ch’el seigi il Cristus.
