da sur Alfred Cavelti
Ina dunna cananea roga Jesus per sia feglia. Ella ha gronda fidonza en quei rabbi giudaic. Mo quel datga nuot dad ella e renviescha ella. El seigi tarmess per il pievel d’Israel e buca per ils auters. Quella direzia da Jesus fa surstar. El ei gie adina aviarts per ils basegns humans.
La dunna lai buca luc. Jesus fa persenn sia gronda fidonza e cardientscha. El fa in cumpliment alla dunna persuenter ed ademplescha siu giavisch.
Mintgaton fa ei basegns da buca schar luc cun rugar. Sche la cardientscha ei cheu, lu astgein nus sefidar ch’igl agid da surengiu vegni baul ni tard.
Mt 15,21–28
21Partend da leu, ei Jesus seretratgs ella cuntrada da Tirus e Sidon. 22Ed uarda, ina dunna cananea da lezza cuntrada ei vegnida ed ha entschiet a grir: Hagies cumpassiun, Segner, fegl da David! Mia feglia ei malamein turmentada d’in demuni. 23Mo el ha rispundiu ad ella buca plaid. Ses giuvnals ein vegni neutier ed han rugau el: Dai suatientscha ad ella, pertgei ella vegn suenter nus a grend. 24Sinquei rispunda el: Jeu sun tarmess mo per las nuorsas piarsas dalla casa d’Israel. 25Mo la femna ei vegnida e sefretga giun plaun avon el ed ha detg: Segner, gida mei! 26El ha rispundiu ad ella: Igl ei buc endretg da prender il paun dils affons e fierer vi als cagneuls. 27Ti has raschun, Segner, ha ella rispundiu; denton era ils cagneuls maglian dallas smiulas che crodan giud la meina da lur patruns! 28Cheu ha Jesus rispundiu ad ella: O dunna, gronda ei tia cardientscha! Ei daventi a ti tenor tiu giavisch! E da quell’ura naven ei sia feglia stada sauna.
