dad Andri Casanova
Jesus seretrai en in liug solitari suenter ver udiu che Gion Battesta ein vegnius scavazzaus entras Herodes. Capeivel! Il carstgaun drova tals muments da reflexiun, oraziun e recreaziun.
Denton colligia igl evangelist Mattiu quei mument solitari immediat cun la dimensiun dalla cuminonza. Ina gronda fuola serimna, e quella ei beinvegnida tier Jesus. Cuntrari als giuvnals tarmetta Jesus buc a casa il pievel. Ed ual en quella situaziun presenta Mattiu l’enzenna dalla spisgentada d’in grond pievel. Enten star ensemen entuorn Jesus vegnan tuts nutri.
El grec entscheiva il passadi dalla spisgientada (14,15) e quella dalla davosa tscheina (26,20) cun exact ils medems plaids. Quei ei in’allusiun che la tschavera eucaristica po nutrir in e scadin. Gie, tala speronza e perschuasiun astgein nus ver, adina cu nus serimnein e fagein cuminonza el num da Jesus.
Mt 14,13–21
13Udend quei ei Jesus seretratgs da leu e navigaus en in liug solitari, tut persuls. Mo il pievel ha enderschiu quei, e las fuolas ein suandadas el a pei ord lur marcaus. 14Bandunond la barca, vesa Jesus ina gronda fuola. Cheu ha el giu cumpassiun dad els e medegau lur malsauns.
15Encunter sera ein ils giuvnals vegni tier el ed han detg: La cuntrada ei desiarta e l’ura avanzada. Relai il pievel, ch’ei mondien els vitgs a cumprar da magliar. 16Jesus denton di ad els: Ei fa buca basegns ch’ei mondien; dei vus ad els da magliar. 17Mo els rispundan: Nus vein cheu nuot auter che tschun pauns e dus pèschs. 18El di: Purtei quels a mi! 19E suenter ver dau al pievel il camond da semetter giu sil pastg, pren el ils tschun pauns ed ils dus pèschs, mira encunter tschiel e di igl engraziament. Lu rumpa el ils pauns e dat els a ses giuvnals, e lezs repartan els al pievel. 20E tuts han magliau detgavunda. Ins ha lu rimnau las restonzas: Dudisch canasters pleins! 21Magliau vevan entuorn tschunmelli umens, senza quintar dunnauns ed affons.
