da sora Armina Maissen
Vul Jesus dir cun quei, ch’ins astgi buca carezar ils geniturs, ni ils geniturs buca il fegl ni la feglia ? – Na, tuttavia buc! La carezia ei «il» condament ch’el ha dau a nus avon che bandunar quest mund, ed il qual cumpeglia tut ils auters condaments. Mo Jesus tschenta prioritats. El vul che nus sedecidîen independentamein e libramein per el. Nus s’udin mo in cuort mument a nos geniturs. «Il Segner» ha «dau» a nus la veta ed el ha dau «per» nus la veta. Nus s’udin ad el. Nus essan sia proprietad. El sulet sa dar e dat a nus ventira e veta cumpleina. Sogn Augustin explichescha quei aschia: «Viers Tei, o Segner essan nus scaffi, e malruasseivels ei nies cor, tochen ch’el ruaussa en Tei». Quei vala per mintga carstgaun, era sch’el ei buca sapientivs da quei.
Mt 10,37–42
37Tgi che tegn bab ni mumma pli car che mei, ei buca vengonzs da mei. E tgi che tegn fegl ni feglia pli car che mei, ei buca vengonzs da mei. 38Tgi che pren buca sia crusch e suonda mei, ei buca vengonzs da mei. 39Tgi che vul anflar sia veta, vegn a piarder quella, e tgi che piarda sia veta per amur da mei, vegn ad anflar ella.
40Tgi che retscheiva vus, retscheiva mei, e tgi che retscheiva mei, retscheiva quel che ha tarmess mei. 41Tgi che retscheiva in profet, perquei ch’el ei in profet, vegn a survegnir la pagaglia che tucca al profet; tgi che retscheiva in gest, perquei ch’el ei in gest, vegn a survegnir la pagaglia che tucca al gest. 42E tgi che dat da beiber ad in da quels pigns era mo in cup aua frestga, perquei ch’el ei in giuvnal, pilver, jeu ditgel a vus: El vegn buc a piarder sia pagaglia.
