da Maria Cristina Derungs-Bartolomei
Otg jamnas essan nus stai «en tschiel», contemplond Quel ch’ei levaus si da mort en veta, il Spert ch’ei vegnius derschius o en nos cors ed egl entir mund, e la sontgissima Trinitad, cuminonza perfetga d’amur ch’ei Diu. En forza de quei essan nus ussa puspei clamai sin tiara, tarmess sco ils discipels de Jesus de siu temps.
La missiun consista buca en instruir en ductrinas, buca en perschuader da s’identificar cun ina gruppa, el senn de baghegiar in cerchel de «nus» differents da «tschels». La missiun ei d’annunziar il schenghetg gratuit della Grazia a tuts, il fatg ch’il reginavel de Diu ei damaneivel de nus, e de metter en circulaziun las forzas dil reginavel cun liberar ils carstgauns da spérts nuscheivels, medegar e curar malsauns e mendus, cun purificar ils leprus, scatschai lunsch dallas cuminonzas ed integrar els puspei el liber scomi cun tuts, purtar la pasch, gie schizun clamar en veta ils morts. Contas morts porta il carstgaun en sesez, avon la mort corporala! E tut quei gratuitamein, sco ils discipels han survegniu quels duns gratuitamein. Quella missiun da medegar e liberar ei biala e fascinonta per tuts battegiai.
Mt 9,36–10,8
36Vesend las roschas da pievel, ha el giu cumpassiun cun els, pertgei els fuvan spussai e starschai sco nuorsas senza pastur. 37Ed el di a ses giuvnals: La raccolta ei gronda, mo luvrers eis ei paucs. 38Rughei pia il patrun dalla raccolta da tarmetter luvrers per sia raccolta.
1Havend clamau neutier ses dudisch giuvnals, ha el dau ad els autoritad sur dils spérts malmunds e pussonza da scatschar els e da medegar scadina malsogna e fleivlezia. 2Ils nums dils dudisch apostels ein: Igl emprem Simon, numnaus Pieder, e siu frar Andriu; Giachen, il fegl da Zebedeus, e siu frar Gion; 3Filip e Barclamiu; Tumasch e Mattiu, il publican; Giachen, il fegl d’Alfeus, e Taddeus; 4Simon, il zelot, e Judas Iscariot che ha tradiu Jesus.
5Quels dudisch ha Jesus tarmess (sco apostels), dond ad els il camond: Buca prendei la via tiels pagauns e buca mei en in marcau dils Samaritans. 6Mei plitost tier las nuorsas piarsas dalla casa d’Israel. 7Mei e perdeghei: Il reginavel da tschiel ei s’avischinaus. 8Medeghei ils malsauns, leventei ils morts, purifichei ils leprus e scatschei ils nauschaspérts. Gratuitamein veis vus retschiert, gratuitamein dueis vus dar.
