da Flurina Cavegn-Tomaschett
Igl evangeli per questa dumengia auda tier ils plaids da cumiau da Jesus. Els valan sco in cert testament per sias giuvnalas e ses giuvnals ed in’orientaziun pil futur. Enramaus vegn igl evangeli digl avis da carezar e tener ils camondaments. Cun camondaments ein buca las leschas manegiadas, mobein la fideivladad alla cardientscha en Jesus. La carezia ei tenor igl evangelist Gion fontauna e finamira dalla veta els fastitgs da Jesus. Tgi che careza stat en sia tradiziun. Tgi che careza vegn adina ad esser ligiaus cun Jesus, era cu quel ei buca pli presents sco carstgaun denter ils carstgauns.
Las giuvnalas ed ils giuvnals da Jesus duein denton buca sesentir persuls, schai anavos, aschia sco orfans. Jesus empermetta ad els in gidonter, il Spert sogn. Il text original grec plaida dil «parákletos», pia d’in paraclet. Quei che la Bibla ecumena romontscha descriva cun «gidonter» savess era vegnir translatau cun assistent, consolader, in clamau neutier ni substitut. In ch’ei cun nus ed accumpogna nus.
E lu, tgei grondiusa empermischun da Jesus: «Vus enconuscheis el, perquei ch’el resta cun vus e vegn ad esser en vus». El, il Spert divin, ei pia en mintgin da nus. Quei ei buca mo ina regal, mobein era ina pretensiun ed ina sfida. La sfida da veser en mintgin, era en quel ch’ei auters che jeu, ina cumpart da Diu, ina flomma divina. Ina sfida che pretenda respect e toleranza, ni detg culs plaids da Jesus «carezia».
Gn 14,15–21
15Sche vus carezeis mei, vegnis vus a tener mes camondaments. 16Jeu vegn a rugar il Bab, ed el vegn a dar a vus in auter gidonter, per ch’el resti adina cun vus. 17Igl ei il Spert dalla verdad ch’il mund sa buca retscheiver, perquei ch’el vesa buc el ed enconuscha buc el. Vus enconuscheis el, perquei ch’el resta cun vus e vegn ad esser en vus. 18Jeu vegn buc a schar anavos vus sco orfans, mobein tuornel tier vus. 19Mo aunc cuort temps, ed il mund vesa buca pli mei; vus denton veseis mei, perquei che jeu vivel e perquei ch’era vus vegnis a viver. 20Gliez di vegnis vus a vegnir pertscharts che jeu sun en miu Bab e vus en mei e jeu en vus. 21Tgi che ha mes camondaments ed observa els, quel eis ei che careza mei. E tgi che careza mei, vegn era a vegnir carezaus da miu Bab, e jeu vegn a carezar el e semanifestar ad el.
