da sur Martin Bearth
Nus vein gest festivau Pastgas, uonn pervia dil coronavirus tut alla metta. Jeu mez hai cantau ton pli ferventamein igl «alleluja» pascal. Tuttina stattan uss el center da quei evangeli pascal treis gadas las «plagas» da Jesus. El cumpara a ses giuvnals e muossa sias plagas. E Jesus lai tuccar Tumasch ellas. Ei dat buca pli in Jesus senza plagas. Quei vul bein era dir a nus ch’ei dat buc ina veta terrestra senza plagas, era buc ina Baselgia da Jesus senza plagas ed era buc in mund senza plagas.
Mo ei dat la speronza ch’ei dat Pastgas suenter il Venderdis sogn. Jesus ha mai discurriu da sia passiun e mort senza sincerar ch’el vegni a levar da mort en veta. Quei ei era nossa ferma speronza, ed era la Baselgia da Jesus duess ir tras tuttas plagas cun quella speronza, ed era il mund ch’ei scaffius da Diu. Ed en tut nossas plagas ei era Jesus cun nus. E sco Maria ed igl apiestel Gion han partiu il Venderdis sogn cun Jesus, astgein era nus quintar che nus essan buca persuls sin nossa via viers Pastgas.
Gn 20,19–31
19La sera digl emprem di dalla jamna, cura ch’ils giuvnals eran radunai per tema dils Gedius davos escha serrada, ei Jesus vegnius, ei staus en lur miez ed ha detg ad els: Pasch cun vus! 20Suenter quei salid ha el mussau ad els ses mauns e sia costa. Vesend il Segner, ein ses giuvnals selegrai. 21Jesus ha turnau a dir ad els: Pasch cun vus! Sco il Bab ha tarmess mei, aschia tarmettel jeu vus. 22Suenter quels plaids ha el fladau sin els e detg: Retschevei il Spert sogn. 23A quels che vus relascheis ils puccaus, ein els relaschai; a quels che vus retenis els, ein els reteni.
24Tumasch, in dils dudisch, numnaus Schumellin, fuva buca cun els, cura che Jesus ei vegnius. 25Ils auters giuvnals han detg ad el: Nus vein viu il Segner. EI ha rispundiu ad els: Sche jeu vesel buca la noda dallas guotas vid ses mauns e sai buca tschentar miu det el liug dallas guotas e miu maun en sia costa, creiel jeu buc. 26Otg dis pli tard fuvan ses giuvnals puspei en casa, e Tumasch fuva cun els. Cheu ei Jesus vegnius, ferton che I’escha fuva serrada. EI ei staus en lur miez ed ha detg: Pasch cun vus! 27Lu ha el detg a Tumasch: Dai neu tiu det e mira mes mauns; pren tiu maun e tschenta el en mia costa e seigies buca nuncartents, mobein cartents! 28Tumasch ha rispundiu ad el: Miu Signur e miu Diu! 29Jesus ha detg ad el: Perquei che ti has viu mei, creias ti? Beai ein quels che vesan buc e creian tonaton!
30Jesus ha fatg en preschientscha da ses giuvnals aunc bia autras enzennas ch’ein buca screttas en quest cudisch. 31Quellas denton ein screttas, per che vus carteies che Jesus ei il Cristus, il Fegl da Diu, e per che vus veies tras la cardientscha la veta en siu num.
