da Mariano Tschuor
En tgei situaziuns cuora il carstgaun? El cuora per far sport. El cuora per fugir d’enzatgi ni d’enzatgei. El cuora sch’el ha prescha da vegnir dad A tier Z. El cuora sch’el vul far paleis urgentamein enzatgei impurtontissim.
Oz fagein nus diever dalla tecnologia per dar vinavon ina novitad, aunc strusch ch’ella ei ina, contonscha ella gia igl adressat. Mo buca dil temps da Jesus. Aschia cuora Maria Madleina, Pieder cuora ed era il giuvnal che Jesus veva bugen cuora. Els cuoran perquei ch’els ein alterai: La fossa vita desorientescha, metta els en perplexadad. Nua ei il Segner? Sch’el mo fuss en fossa; sche mo sias restonzas terrestras fussen en fossa! Ei dess in liug per «ir sur loghens». In liug da memoria. In liug da pelegrinadi. Quei fuss zatgei palpabel, materialmein existent. Ei mass pli tgunsch da crer.
Nua eis, Segner? Aschia clamein nus era oz. Pir che zacu essan nus alterai, perplex, desorientai. Nua lein cuorer per arrivar a certezia e segirtad? Tgi lein emparar? Sco la giuvnala ed ils giuvnals che vevan aunc buca capiu il senn dalla fossa vitta, capin era nus buc: «Pertgei veis tanienta tema? Daco veis buca cardientscha?» (Mc 4,40). Lein buc cuorer naven. Lein cuorer neutier. Ed encurir il Segner leu nua ch’el ei: el conhuman.
Gn 20,1–9
1Igi emprem di dalla jamna ei Maria Madleina vegnida la damaun ch’ei fuva aunc stgir sin fossa ed ha viu ch’il crap era dustaus dalla fossa. 2Cheu eis ella currida e vegnida tier Simon Pieder e I’auter giuvnal, quel che Jesus carezava, ed ha detg ad els: Ei han priu il Segner ord fossa, e nus savein buca, nua ch’ei han mess el. 3Sinquei ein Pieder e I’auter giuvnal i giuado ed ein arrivai alla fossa. 4Domisdus currevan ensemen, mo I’auter giuvnal ei currius ordavon a Pieder ed arrivaus igl emprem alla fossa. 5El ei staus giudavon ed ha viu ils lenzeuls giun plaun mo ei buc ius viaden. 6Uss ei era Simon Pieder che suandava el arrivaus ed entraus ella fossa. EI ha viu ils lenzeuls giun plaun 7ed il sudari, cul qual il tgau da Jesus era staus cuvretgs; quel fuva denton buca sper ils lenzeuls, mobein zugliaus ensemen en in liug dapersei. 8Uss ei era I’auter giuvnal che fuva vegnius igl emprem alla fossa ius viaden; el ha viu e cartiu. 9En verdad vevan els aunc buca capiu ch’el stoppi, tenor la Scartira, levar da mort en veta.
