da sora Florentina Camartin
Ina spisa senza sal e cungiment gusta buca bein e tgi che ei el stgir vesa buca nua ch’el va. Sche nus mirein entuorn en nies mund ei bein bia da quei che sepresenta senza mur e savur e bia sesanfla el stgir ed ei senza speronza. Quei ei buca pér oz aschia. Perquei ha Dieus tarmess a nus siu sogn Fegl, Jesus Cristus, dil qual gia il vegl Simeon ha detg: «Mes egls han viu il salit … El ei ina glisch per sclarir ils pagauns e glorificar tiu pievel Israel» (Lc 2,30ss). E daveras, duront sia veta publica di Jesus inagada sez: «Jeu sun la glisch dil mund. Quel che suonda mei, vegn buc a viandar ella stgiradetgna, mobein vegn ad haver la glisch dalla veta» (Gn 8,12).
Egl evangeli dad oz fa Jesus a nus ed a tut quels che suondan el in grond cumpliment schend: «Vus essas il sal dalla tiara!» e «Vus essas la glisch dil mund!» (Mt 5,13.14). Per saver esser sal dalla tiara e glisch dil mund stuein nus denton esser uni cun el. Dat el vegn la glisch ed il gust che nus savein dar vinavon. Cun el savein nus far di per di quei che el fagess en nies stagl. Quei ei buca adina lev e cumadeivel. Meinsvart ha ei era num mussar colur, star en per ina buna caussa ni prender partida per la giustia denter concarstgauns ni desister da zatgei per amur dad enzatgi auter. Quei dat sal e peiver, glisch e dinamica en nossa veta.
Mt 5,13–16
13Vus essas il sal dalla tiara. Mo sch’il sal piarda sia forza, cun tgei san ins far ch’el daventa puspei sal? El ei buns per nuot auter che da vegnir bess naven e zappitschaus dalla glieud. 14Vus essas la glisch dil mund. In marcau situaus sin in cuolm sa buca star zuppaus. 15Ins envida era buc ina cazzola per metter ella sut la curtauna, mobein sil candelier, nua ch’ella fa clar a tut quels ch’ein en casa. 16Aschia duei vossa glisch sclarir avon ils carstgauns, per ch’els vesien vossas bunas ovras e glorificheschien vies Bab en tschiel.
