da sora Armina Maissen
Ins ha il sentiment che Jesus buca mo mondi da Galilea agl Jordan, mobein camini, perschuadius che l’ura da siu messadi, da siu pass en la publicitad, seigi ussa cheu. El vuleva esser uss tier il pievel. E la confirmaziun che quei mument ei arrivaus, ha el lu era survegniu prest egl Jordan sin la pli sublima moda da siu e nies bab en tschiel. Suenter ch’el ha schau battegiar ei il tschiel sesaviarts ed ina vusch ha clamau: «Quei ei miu carezau Fegl, da quel hai jeu miu cumplascher.»
Quella vusch ha buca mo valiu per el e per Gion Battesta, mobein era per nus che stein en la retscha da ses carezai. Mintgin da nus, senza excepziun, astga sesentir affon carezau da Diu. En il batten havein nus retschiert persunalmein quella segirtad. Igl ei in schenghetg. Mo quei schenghetg cuntegn sco consequenza era ina missiun. La carezia divina vul vegnir purtada entras nus tier ils carstgauns e dar perdetga da siu agir en nus entras il Spert sogn. Sia preschientscha ed assistenza ein empermessas, schibein el Veder sco el Niev Testament: «Siu num ei: Immanuel, Diu cun nus» (tenor Jes 7,14), e «Jeu sun cun vus tut ils dis entochen la fin dil mund» (Mt 28,20).
Mt 3,13–17
13Cheu ei era Jesus vegnius dalla Galilea al Jordan tier Gion per seschar battegiar dad el. 14Mo Gion ha vuliu impedir el ed ha detg: Jeu hai basegns da vegnir battegiaus da tei, e ti vegns tier mei! 15Jesus rispunda: Lai ual. Ei descha a nus da cumplenir tutta giustia. Allura ha Gion admess el. 16Immediat suenter il batten ei Jesus vegnius ord l’aua. Ed uarda, il tschiel ei s’aviarts. El ha viu il Spert da Diu a descendend sco ina columba ed a vegnend sur dad el. 17Ed ina vusch giu da tschiel ha clamau: Quei ei miu zun carezau Fegl, da quel hai jeu miu cumplascher.
