da Marcel Köhle
La fiasta da Buania ei sper la fiasta da Nadal il secund punct culminont dallas celebraziuns festivas che regordan nus alla naschientscha da Jesus Cristus.
En nos usits religius ein ils sabis ord igl evangeli daventai treis retgs che nus enconuschin sco Caspar, Meltger e Baltasar. – Tuttina sch’ei setracta ussa da sabis, astrologs ni retgs, egl evangeli da Buania vegnin nus confruntai cun persunalitads respectablas. Quels sabis percorschan ils fenomens dil tschiel ed ils segns dil temps che annunzian la naschientscha dil Segner. Els ein suandai la steila ed han aschia encuriu ed anflau il nievnaschiu retg a Betlehem.
Buania ei perquei era la fiasta da tut quels che encueran Diu. Possi la fiasta dad oz era far persenn che nus cartents essan adina sin via per encurir Diu en nossa veta e nies mintgadi.
Mt 2,1–12
1Cura che Jesus ei naschius a Betlehem en Giudea dil temps dil retg Herodes, uarda, cheu ein sabis vegni digl Orient a Jerusalem 2ed han dumandau: Nua ei il nievnaschiu retg dils Gedius? Nus vein viu sia steila egl Orient ed essan vegni per adurar el.
3Udend quei, ha il retg Herodes pigliau tema, e tut Jerusalem cun el. 4El raduna tut ils premsacerdots e mussaders dil pievel e damonda quels, nua ch’il Messias hagi da nescher. 5Quels rispundan ad el: A Betlehem en Giudea; pertgei aschia scriva il profet:
6E ti Betlehem, tiara da Juda,
ti eis tuttavia buc il mender denter ils marcaus principals da Juda,
pertgei da tei vegn a sortir in regent,
e quel vegn a pascular miu pievel Israel.
7Sinquei cloma Herodes discusamein ils sabis e damonda els exactamein, da tgei temps che la steila seigi cumparida, 8e tarmetta lu els a Betlehem schend: Mei e tscherchei minuziusamein igl affon. Cu vus veis anflau el, dei part a mi, per che era jeu sappi ir ad adurar el. 9Suenter ver tedlau il retg ein els semess sin via. Ed uarda, la steila ch’els vevan viu egl Orient mava ordavon ad els, tochen ch’ella ei sefermada sur il liug, nua ch’igl affon fuva. 10Vesend la steila, ein els selegrai zun fetg. 11Els ein entrai en casa, han viu igl affon cun Maria, sia mumma, ed ein sefiers per tiara ed han adurau el. Lu han els scuvretg lur scazis e presentau ad el regals: Aur, entscheins e mirra. 12Ed avisai en siemi da buca turnar tier Herodes, ein els turnai per in’autra via en lur tiara.
