dad Ursicin G. G. Derungs-Bartolomei
Per igl evangelist Mattiu eis ei impurtont da dir che tut secumpleini tenor las Scartiras. Quei che schabegia entuorn la naschientscha e l’affonza de Jesus ei buca casual, mobein stat el grond context della historia dil pievel eligiu.
Sur tut veglian aunghels. Tgei ein aunghels? Aunghels ein il «patratg de Diu» ni il «quitau de Diu», ni il «maun de Diu» che teissa il present cul fil dils temps vargai.
Gronda ei la figura de Giusep. Gronda, perquei ch’el capescha quei maun nunveseivel ed obedescha. Buca obedientscha tschocca, mobein l’obedientscha ded in ch’ha viu en sia veta il «quitau de Diu» che diregia ils schabetgs en moda silenziusa e zuppada. La figura e veta de Giusep secuarclan culs plans de Diu che mettan en embrugl las speculaziuns de carstgauns, dils differents «Herodes» che crein da saver direger e cumandar mintgamai co il mund hagi dad ir.
Mt 2,13–15.19–23
13Suenter ch’ils sabis ein stai parti, ei in aunghel dil Segner cumparius en siemi a Giusep ed ha detg: Leva, pren igl affon e sia mumma e fui en Egipta e stai leu, entochen che jeu ditgel a ti. Pertgei Herodes tscherca igl affon per far murir el. 14Ed el ei levaus, ha priu da notg igl affon e sia mumma ed ei fugius en Egipta. 15Leu eis el restaus entochen la mort da Herodes. Aschia dueva secumplenir quei ch’il Segner veva detg tras il profet:
Ord l’Egipta hai jeu clamau miu fegl.
19Cura che Herodes ei staus morts, ei in aunghel dil Segner cumparius en siemi a Giusep ell’Egipta 20ed ha detg: Leva, pren igl affon e sia mumma e tuorna ella tiara d’Israei, pertgei quels che tschercavan da prender la veta agl affon ein morts. 21Giusep ei levaus, ha priu igl affon e sia mumma ed ei turnaus ella tiara d’Israel. 22Mo udend che Arhelaus regi en Giudea enstagl da siu bab Herodes, ha el temiu da serender leu. Avisaus en siemi, eis el seretratgs ella cuntrada dalla Galilea. 23El ei secasaus en in marcau, numnaus Nazaret. Aschia dueva secumplenir il plaid dils profets:
Ins vegn a numnar el il Nazaren.
