da sur Alfred Cavelti
Il Vierv ch’ei Dieus e che vegn annunziaus als carstgauns, ei daventaus carn. El ei seunius cun in carstgaun concret, cun Jesus da Nazaret. Consequentamein ei il Vierv da Diu buca mo plaid, mobein veta, in carstgaun. El ei glisch ella stgiradetgna humana. Quei Vierv, in carstgaun concret, ha priu avdonza denter nus, resta cun nus. Cartents vesan la maiestad dil Vierv, dil Fegl ch’el ha retschiert dil Bab. Quei ei ovra da Diu, buca da nus carstgauns. Nossa missiun ei da daventar carstgaun, q.v.d. da daventar pli humans ed esser glisch e schar radiar quella glisch dil Vierv, dil Cristus, en nies mund.
Gn 1,1–18
1All’entschatta era il Vierv,
ed il Vierv era tier Diu,
e Dieus era il Vierv.
2El era all’entschatta tier Diu.
3Tut ei daventau tras el,
e senza el ei nuot daventau.
4En el era la veta,
e la veta era la glisch dils carstgauns.
5E la glisch sclarescha ella stgiradetgna,
e la stgiradetgna ha buca tschaffau ella.
6Vegnius ei in carstgaun tarmess da Diu, cun num Gion. 7Quel ei vegnius sco perdetga, per dar perdetga dalla glisch, sinaquei che tuts creigien tras el. 8El era buca la glisch, mobein dueva dar perdetga dalla glisch.
9La vera glisch
che sclarescha tut ils carstgauns
ei vegnida sil mund.
10Il Vierv era sil mund,
ed il mund era daventaus entras el,
mo il mund ha buca enconuschiu el.
11En siu agen eis el vegnius,
mo ils ses han buca retschiert el.
12A tut quels denton che han retschiert el, ha el dau il dretg da daventar affons da Diu. Quei ein quels che creian en siu num, 13quels ch’ein buca naschi ord il saung, buca ord il vuler dalla carn e buca ord il vuler digl um, mobein orda Diu.
14Ed il Vierv ei daventaus carn
ed ha avdau en nies miez,
e nus vein viu sia gloria,
la gloria ch’el ha da siu Bab sco unic Fegl,
pleins da grazia e verdad.
15Gion dat perdetga dad el. El ha clamau cun aulta vusch: Gest da quel hai jeu detg: Quel che vegn suenter mei, ei ordavon a mi, perquei ch’el ei staus avon che jeu.
16Da sia plenezia vein nus tuts retschiert: Grazia sin grazia.
17La lescha ei dada entras Moses, la grazia e la verdad ei vegnida entras Jesus Cristus. 18Diu negin che ha viu enzacu; igl unic Fegl ch’ei el Bab, lez ha purtau novas.
