da Maria Cristina Derungs-Bartolomei
Il raquent della naschientscha de Jesus resumescha igl entir Evangeli. Quei raquent teissa ensemen fatgs e schabetgs ch’ein el medem mument simbols, q.v.d. elements che visan sin quei ch’ei nunveseivel.
Jesus nescha a Bet-lehem, la «casa dil paun»; vegn mess en in pursepen, nua ch’ins metta il pavel. El ei il ver nutriment dil carstgaun. El medem mument visa il pursepen vi sil lenn della crusch. Sco quei ch’ils piazs els quals el vegn zugliaus ein ina allusiun al lenziel cul qual el vegn mess pli tard en fossa.
Jesus nescha e miera ordeifer il marcau, agl ur, denter quels che papa Franzestg numna «ils zavrai o». La nova vegn dada a pasturs, glieud dubiusa e sprezzada, sco quei che dunnauns, era ellas sprezzadas e consideradas nuncarteivlas, annunzian sia levada. Per veser igl eveniment surprendent de Nadal survegnin nus ina glisch speciala da tschiel. La glisch che surpren ils pasturs ed alla quala els dattan suatientscha, semettend sin via encunter Betlehem nua ch’els anflan il Bambin. La glisch vera ei sez il Vierv daventaus carn che sclarescha mintga carstgaun. Dieus sesbassa per vegnir en in cuvel per animals, per vegnir buca sco in pussent patrun, mobein sco in survient, in amitg, in che tonscha il maun per dar agid e fa buca tema.
Lc 2,1–14
1Da gliez temps ha igl imperatur Augustus dau il camond da registrar la glieud digl entir mund. 2Quei ei stau l’emprema dumbraziun ed ei vegnida fatga duront che Quirinius fuva guvernatur dalla Siria. 3E tuts mavan per seschar enscriver, mintgin en siu marcau. 4Era Giusep ha bandunau il marcau da Nazaret en Galilea ed ei serendius en Giudea el marcau da David, numnaus Betlehem, perquei ch’el era dalla casa e schlatteina da David. 5El ei vegnius per seschar enscriver ensemen cun Maria sia spusa che fuva purtonta. 6E ferton ch’els eran leu, ein ils dis secumpleni ch’ella dueva parturir. 7Ella ha parturiu siu fegl, siu empremnaschiu, ha enfaschau el e mess en pursepen, perquei ch’ei fuva buca plaz per els ella casa d’albiert.
