dad Andri Casanova-Baumgartner
Sch’ei vegn tschentau ina damonda, astgan ins quintar cun ina risposta. Jesus rispunda denton buc sin la damonda sch’el seigi quel che ha da vegnir. Quella damonda vegneva da Gion Battesta. Igl evangelist lai aviarta la damonda, el vul che nus empruein da dar la risposta. Ei Jesus il Messias, quel che porta il salit?
Cun sia damonda prepara Gion Battesta adina puspei la via per Jesus Cristus. E nossa risposta sto buc encurir in strom-paliu che vegn ballontschaus dil vent ni in carstgaun en vestgadira loma. Pertgei gliez ei svaneivel, aschia sco era Herodes Antipas, al qual il text fa allusiun. Nossa egliada duei esser drizzada sil pauper ed uiersch. Senza prender scandel!
Mt 11,2–11
2Udend Gion en perschun dallas ovras da Cristus, ha el tarmess ses giuvnals a dumandar el: 3Eis ti quel che ha da vegnir ni vein nus da spitgar in auter? 4Jesus ha rispundiu ad els e detg: Mei e rapportei a Gion quei che vus udis e veseis: 5Tschocs vesan, schirai van entuorn, leprus vegnan purificai, suords audan, morts vegnan leventai, paupers retscheivan la buna nova; 6e beaus quel che pren buca scandel da mei.
7Quels ein s’allontanai, e Jesus ha entschiet a plidar cul pievel sur da Gion: Tgei essas i ora el desiert a mirar? In strom-paliu che vegn ballontschaus dil vent? 8Ni tgei essas i a mirar? In carstgaun en vestgadira loma? Mirei, quels che portan vestgadira loma anfl’ins ellas casas dils retgs. 9Sche pertgei essas i ora? Per mirar in profet? Gie, jeu ditgel a vus: Dapli ch’in profet. 10Igl ei quel, dil qual ei stat scret:
Uarda, jeu tarmettel miu mess ordavon a ti,
e quel prepara la via per tei.
11En verdad, jeu ditgel a vus: Denter ils naschi d’ina femna ei maina cumpariu in pli grond che Gion Battesta. E tuttina, il pli pign el reginavel da tschiel ei pli gronds che el.
