da sur Martin Bearth
Gion Battesta ei in profet che fa veramein empau tema e sterment. Gia sia vestgadira e bia dapli ses plaids ussa en quei priedi als farisès e sadducès. «Razza da vipras» numna el quels, ils menaders e parsuras dil pievel. Ils farisès fuvan la partida religiusa e rigurusa, ils sadducès la partida politica plitost mundana. Gion Battesta pretenda dad els detschartamein conversiun, vul dir da midar patratg, midar veta.
Tgei di Gion Battesta era a nus, oz, a mi ed a ti? Tgei vein nus da midar, per che nossa veta semadiri e daventi sco buna salin? – Igl «Immanuel», il Diu cun nus, vegnius tier nus en Jesus, gidi nus a midar quei ch’ei da midar, per che nus seigien «spigias» madiras, cu El vegn per rimnar «sia salin en garner».
Mt 3,1–12
1Lezs dis ei Gion Battesta vegnius ed ha perdegau el desiert dalla Giudea schend: 2Midei patratg e seconverti, pertgei il reginavel da tschiel ei damaneivel. 3Da quel ha il profet Jesaja detg:
La vusch dad in che grescha el desiert:
Preparei la via dil Segner,
fagei uliv las sendas per el!
4Gion purtava in manti da peil camel ed ina tschenta da curom entuorn veta. Sia vivonda eran saleps e mèl selvadi. 5Tier el serendevan Jerusalem e tut la Giudea e l’entira cuntrada dil Jordan. 6Els seschavan battegiar dad el ellas auas dil Jordan e confessavan lur puccaus.
7Vesend che biars farisès e sadducès vegnevan tier il batten, di el ad els: Razza da vipras! Tgi ha mussau a vus da mitschar dalla gretta vegnenta? 8Purtei fretgs che corrispundan alla conversiun. 9Buca tertgei: Nus vein Abraham per bab. Pertgei jeu ditgel a vus: Dieus ei el cass da leventar ord questa crappa affons per Abraham. 10La sigir ei gia fitgada ella ragisch dallas plontas. Mintga plonta che porta buca bien fretg, vegn derschida e bessa el fiug. 11Jeu battegel vus cun aua per la conversiun. Mo quel che vegn suenter mei, lez ei pli pussents che jeu. Jeu sun buca vengonzs da purtar ses calzers. El vegn a battegiar vus el Spert sogn ed el fiug. 12El tegn gia enta maun la pala e vegn a schubergiar siu iral da rudien. Sia salin vegn el a rimnar en garner, la paglia denton a barschar el fiug che stezza mai.
