da sora Florentina Camartin
Il text da quei evangeli dat daveras da patertgar! Jesus plaida da catastrofas e da tribulaziuns. Tgei eveniments manegia el propi? Forsa la destrucziun totala da Jerusalem e dil tempel entras ils Romans ni schizun la fin dil mund? Propi tgei ch’el ha manegiau cun quels scenaris e cura che quels succedan sa negin. El di gie sez: «Gliez di ni lezz’ura negin ch’enconuscha, ni ils aunghels dil tschiel ni il Fegl, negin auter ch’il Bab persuls.»
Era las semeglias dil figher che ha schit e dil patrun che vegliass per buca schar rumper en en sia casa vulan far attents dad esser veglionts e promts, q.v.d. far mintga mument quei ch’ins sa. Probabel ha quei text era giu il senn da far curascha als emprems cristifideivels en lur tribulaziuns e persecuziuns (quei text ei gie vegnius screts si per da gliez temps). El vul bein era dir da buca crer a profezias che vulan saver cura che la fin dil mund vegni.
Mt 24,29–44
29Immediat suenter la tribulaziun da lezs dis vegn il sulegl a sestgirentar, la glina vegn a piarder siu clar, las steilas vegnan a curdar da tschiel e las forzas dil tschiel vegnan zaccudidas. 30E lu vegn l’enzenna dil Fegl dil carstgaun a cumparer vid il tschiel; e tuttas naziuns dalla tiara vegnan a pitgar sil pèz; ed ins vegn a veser il Fegl dil carstgaun a vegnend sillas neblas dil tschiel cun pussonza e gronda maiestad. 31Ed el vegn a tarmetter ses aunghels cun ferm tun da posaunas per rimnar ses eligi dallas quater varts dil mund, d’ina vart dil tschiel entochen l’autra.
32Dil figher emprendei la semeglia. Cura che sia roma ha schit e sia feglia catscha, saveis vus che la stad ei damaneivel. 33Aschia era vus: Cura che vus veseis tut quei, saveis vus ch’El ei damaneivel, gest avon porta. 34En verdad, jeu ditgel a vus: Questa generaziun vegn buc a svanir, avon che tut quei daventi. 35Tschiel e tiara vegnan a svanir, mo mes plaids svaneschan buc. 36Gliez di ni lezz’ura negin ch’enconuscha, ni ils aunghels dil tschiel ni il Fegl, negin auter ch’il Bab persuls.
37Sco ils dis da Noe, aschia vegn la vegnida dil Fegl dil carstgaun ad esser. 38Ils dis avon il diluvi magliav’ins e buev’ins, prendeva dunna e mariu, tochen il di che Noe ei entraus ell’arca, 39ed ins sminava nuot, tochen ch’il diluvi ei vegnius ed ha raffau naven tuts. Aschia vegn era la vegnida dil Fegl dil carstgaun ad esser. 40Lu vegnan dus umens ad esser sil funs: In vegn prius naven e l’auter schaus anavos; 41e duas femnas ch’ein vid il mulin e molan: Ina vegn prida naven e l’autra schada anavos.
42Vegliei pia, pertgei vus saveis buca, tgei di che vies Signur vegn. 43Mo quei saveies: Sch’il patrun-casa savess, da tgei uras ch’il lader vegn la notg, vegliass el e schass buca rumper en sia casa. 44Seigies pia era vus preparai, pertgei il Fegl dil carstgaun vegn d’ina ura che vus maina smineis.
