da Maria Cristina Derungs-Bartolomei
La fiasta de Cristus Retg ei vegnida instituida anno 1925 da papa Benedetg XV. D’in temps ch’ils numerus retgs ch’ei deva aunc el mund eran buca pli «cristians» sco enzatgei che secapescha da sesez, e las dictaturas entschavevan a sefar valer, haveva quella fiasta la finamira de suttastrihar Cristus sco retg de tuts retgs e pretender ina renconuschientscha publica de quei primat.
Da quei spért e da quella situaziun essan nus oz fetg lunsch naven. Quei ha igl avantag de liberar quella fiasta da sia muntada originala, politica e polemica. Nus astgein scuvierer adina puspei da niev «co» Jesus ei retg, el ch’ha refusau per sesez quella rolla e quei tetel malcapeivel e malcapiu (cf. Gn 6,15). Il tetel de retg de Cristus ei screts vid la Crusch. Quella ei siu «tron regal». Jesus regia auter ch’ils menaders dils pievels ch’exerciteschan pussonza sur de tschels. Ses discipels ein clamai a far il medem (cf. Lc 22,26). La regalitad de Jesus serealisescha en siu dar vi sesez totalmein per amur.
Sco il teolog Johann Baptist Metz admonescha denton, stuein nus sepertgirar dil prighel da glorificar la crusch e surveser ils crucifigai ded oz. Nus astgein selegrar che l’emprema canonisaziun, succedida senza basegns de miraclas, ei quella ded in malfatschent: «ti vegns ad esser oz cun mei el paradis» (cf. Lc 23,43). Quei dat speronza era a nus d’astgar haver part en quei reginavel de misericordia, sche mo nus laschein reger Jesus e buca auters «retgs» en nossa veta.
Lc 23,35–43
35Il pievel steva e mirava. Ils parsuras fagevan beffas e schevan: Auters ha el salvau; el salvi sesez, sch’el ei il Messias da Diu, igl eligiu! 36Era la schuldada beffegiava el. Ei vegnevan neutier, purschevan ischiu ad el e schevan: 37Sche ti eis il retg dils Gedius, salva tetez! 38Sur el fuva ina inscripziun per grec, latin e hebraic: Quei ei il retg dils Gedius.
39In dils malfatschents pendiu insultava el e scheva: Eis ti buc il Messias? Sche salva tetez ed era nus! 40Mo l’auter ha sevilau sin el e detg: Has ti gnanc tema da Diu, ti che stas sut la medema sentenzia? 41Nus tucca quella cun raschun, pertgei nus retschevein tenor nossas ovras. Quel denton ha fatg nuot dil mal. 42Ed el ha detg: Jesus, seregorda da mei, cu ti vegns en tiu reginavel! 43E Jesus ha rispundiu: En verdad, jeu ditgel a ti: Dad oz naven vegns ti ad esser cun mei el paradis.
