da Marcel Köhle
In messadi central egl evangeli da Lucas ei la misericordia divina che enconuscha negins cunfins. Quella semanifestescha era en ina moda surprendenta el raquent da Zacheus.
En quella historia udin nus co Jesus vegn el marcau da Jerico e co Zacheus ha tschercau da veser el. Mo igl andament dil raquent dat era il sentiment che Jesus vess encuriu il contact cun el e s’envida perquei en sia casa.
Ad in raffader e cuglienader sco Zacheus era, dessan nus probabel negina secunda schanza. Mo Jesus semuossa misericordeivels e vesa en Zacheus in carstgaun da buna voluntad e less s’entupar cun el. En quella sentupada misericordeivla convertescha Zacheus e less smetter tut ils puccaus e muncaments ch’el ha fatg enviers ses concarstgauns.
En quella historia vegn propi veseivel che Dieus less spindrar quei ch’era piars. – Tut tgei ch’ei drova persuenter ei la promtadad da vuler s’entupar cun el sco quei ch’igl ei schabegiau tier Zacheus.
Lc 19,1–10
1Lu eis el vegnius a Jerico ed ei ius tras il marcau. 2Ed uarda, cheu fuva in um cun num Zacheus. Quel fuva cau dalla duana ed era rehs. 3El tschercava da veser, tgi che Jesus seigi. Muort la fuola fuva quei denton nunpusseivel per el, pertgei el fuva pigns da statura. 4El ei currius ordavon e revius sin in figher selvadi per veser Jesus che stueva vegnir leu sperasvi. 5Arrivaus en quei liug, ha Jesus alzau l’egliada e detg ad el: Zacheus, fai spert e neu giu, pertgei oz stoi jeu prender albiert en tia casa! 6Ed el ei descendius beinspert ed ha retschiert Jesus cun grond plascher. 7Tut quels che han viu quei murmignavan e schevan: Tier in puccont ha el priu albiert! 8Mo Zacheus ei passaus avon il Segner ed ha detg: Mira, Segner, la mesadad da mia rauba dun jeu als paupers, e sche jeu hai cuglienau enzatgi, vi jeu restituir il quaterdubel. 9E Jesus ha detg ad el: Oz ha questa casa retschiert spindrament, pertgei era el ei in fegl d’Abraham. 10Il Fegl dil carstgaun ei gie vegnius per encurir e spindrar quei ch’era piars.
