da Flurina Cavegn-Tomaschett
Detg cuortamein: «Tegn la dira! Fai oraziun!» cusseglia Jesus a nus ferventamein egl evangeli dad oz. Gie, tener la dira ei buc adina schi lev, oravontut sch’ins ha il sentiment che nuot semidi. Per perschuader ses giuvnals raquenta Jesus ina semeglia davart in derschader malgest. Lez vegn la finala cumparegliaus cun Diu, il derschader cul bien cor, che exauda, sche nus havein la perseveronza dad urar tier el.
La vieua numnada ella semeglia haveva el temps da Jesus in auter status che oz, oravontut quei che pertucca l’existenza finanziala. Ella valeva sco quei exempel per paupradad e dependenza d’agid. Igl ei pia buca da far curvien, ch’ei resta ad ella nuot auter che tener la dira per saver surviver, per vegnir tier siu dretg.
L’oraziun mida buca adina nossa situaziun sin quella moda ed en quei mument, che nus vessen bugen. L’oraziun sa denton midar nus e dar a nus forza per dumignar e tener ora quei che fa fastedis.
Lc 18,1–8
1Jesus ha raquintau ad els ina semeglia per mussar ch’ins dueigi adina urar e buca calar. 2El ha detg: En in marcau viveva in derschader che veva ni tema da Diu ni turpetg avon ils carstgauns. 3En quei marcau viveva era ina vieua che vegneva adina puspei tier el e rugava: Procurescha per dretg a mi encunter miu adversari! 4Ditg e liung ha el nuota vuliu. Mo lu ha el detg siper sesez: Sche jeu hai era buca tema da Diu e turpetg avon ils carstgauns, 5sche vi jeu tonaton procurar per dretg a quella vieua. Schiglioc vegn ella aunc il davos e seglia en fatscha a mi.
6Ed il Segner ha detg: Tedlei tgei ch’il malgest derschader di! 7E Dieus duess buca procurar per dretg a ses eligi che greschan tier el di e notg e ver pazienzia cun els? 8Jeu ditgel a vus: Beinspert vegn el a procurar giustia ad els. Mo il Fegl dil carstgaun, anfla quel bein cardientscha sin tiara, cura ch’el vegn?
