da sur Martin Bearth
Ina cardientscha mo aschi gronda sco in graun da senav para veramein dad esser ina pintga cardientscha. Mo il pli impressiunont ei quei che Jesus di en auters connexs sur dil garnetsch da senav. Quel sa daventar «la pli gronda da tuttas caglias en iert, da maniera ch’ils utschals dil tschiel anflan schurmetg en si’umbriva» (Mc 4,32). Quei ei la speronza da nies fleivel crer e sefidar. Denton in pign garnetsch sto «vegnir semnaus el tratsch» (Mc 4,31), el bien tratsch digl iert. Quei vul bein dir, ch’el sto vegnir semnaus egl «iert da nies cor»: En nos patratgs, nos plaids e nossas ovras, en nies selegrar e nies pitir, en nies urar e nies luvrar. Quei ei la via da nossa cardientscha. Ella vegn lu gronda e ferma e regala «umbriva e schurmetg als utschals dil tschiel», era a quels damaneivel.
Lc 17,5–10
5Ils apostels han detg al Segner: Dai a nus pli bia cardientscha! 6Ed il Segner ha detg: Sche vus vesses ina cardientscha mo schi gronda sco in graun da senav, lu savesses vus dir a quest figher selvadi: Neuado cun ragisch e tut e seplonta ella mar! – ed el vegness ad obedir a vus.
7Tgi da vus di a siu fumegl che ara ni fa il pastur, cura ch’el retuorna dil funs: Neu uss e semetta a meisa? 8Vegn el buca plitost a dir ad el: Fai a mi zatgei da magliar, lu metta si scussal e survescha a mi, tochen che jeu hai buiu e magliau; lu sas ti beiber e magliar? 9Sa el forsa grau al fumegl, perquei ch’el ha fatg tenor siu camond? 10Aschia era vus: Cura che vus veis fatg tut quei ch’ei stau cumandau a vus, sche schei: Nus essan fumeglia da pauc; nus vein fatg mo quei ch’ei stau nies duer.
