da sur Marcus Flury
Quella semeglia ed ils plaids da Jesus ein grevs da capir. Igl ei remarcabel co Jesus lauda in administratur malrecli che mida cefras ella contabilitad da siu patrun per sefar beinvesius tiels debiturs da lez. Ella semeglia digl administratur malrecli lauda Jesus buca las cugliunarias digl administratur, mobein sia malezia. El ha capiu sia situaziun critica ed ha lu reagau leusuenter. Prudent ei cheu tgi che patratga vid il temps nua ch’ins ha da dar quen. Sco cartents duessen nus – quei che pertucca nossa veta cristiana – esser silmeins schi prudents sco ils affons da quest mund e far tut il pusseivel per contonscher la ventira el reginavel da Diu.
Tier las semeglias che Jesus raquenta ei la construcziun finala la clav che gida a capir il cuntegn. «In fumegl sa buca survir a dus patruns; u ch’el odiescha in e careza l’auter, ni ch’el setegn vi dad in e sbetta l’auter. Vus saveis buca survir a Diu ed al mammon.» La damonda ei pia en tgi ni en tgei mettel jeu mia fidonza, en caussas che svaneschan ni en Diu?
Lc 16,1–13
1El ha era detg a ses giuvnals: In um reh veva in administratur. Quel ei vegnius tgisaus tier el ch’el sfarlati sia rauba. 2El ha fatg clamar el ed ha detg: Tgei stoi jeu udir da tei? Dai quen da tia administraziun, pertgei ti sas buc esser pli ditg administratur. 3Cheu ha igl administratur tertgau per sesez: Tgei duei jeu pigliar a mauns ussa che miu patrun pren a mi l’administraziun? Cavar? Quei sai jeu buc. Ir a rugar? Da quei seturpegel jeu. 4Ussa sai jeu tgei far, per ch’ei dettien suttetg a mi inaga che jeu sun relaschaus da miu survetsch.
5Lu ha el fatg vegnir ils debiturs da siu patrun in ad in ed ha detg agl emprem: Con eis ti culponts a miu patrun? – 6Tschien mesiras ieli, ha quel rispundiu. Igl administratur ha detg ad el: Pren tiu quen, sesa e scriva beinspert tschunconta. 7Lu ha el detg ad in auter: E ti, con eis ti culponts? – Tschien mesiras graun, ha quel rispundiu. Igl administratur ha detg ad el: Pren tiu quen e scriva otgonta.
8Ed il signur ha ludau quei administratur malrecli, perquei ch’el hagi agiu prudent. Pertgei ils affons da quest mund ein denter quels da lur pèr pli prudents ch’ils affons dalla glisch.
9Era jeu ditgel a vus: Procurei per amitgs cun il mammon malgest, per ch’ins retscheivi vus ellas avdonzas perpetnas, cu ei va alla fin. 10Tgi ch’ei fideivels el pauc, ei era fideivels el bia, e tgi ch’ei malreclis el pauc, ei era malreclis el bia. 11Sche vus essas pia buca semussai fideivels enten administrar il mammon malgest, tgi vegn lu a confidar a vus il ver scazi? 12E sche vus essas buca semussai fideivels enten administrar il bein jester, tgi vegn lu a surdar a vus vies agen scazi?
13In fumegl sa buca survir a dus patruns; u ch’el odiescha in e careza l’auter, ni ch’el setegn vi dad in e sbetta l’auter. Vus saveis buca survir a Diu ed al mammon.
