da Marcel Köhle
Il messadi che Jesus drezza en quest evangeli a ses auditurs, ei ferm tubac: Tgi che banduna buca tut, sa buca daventar siu giuvnal.
Manegia Jesus serius quei? Tgi sa schon ademplir quella pretensiun? Tgi ei promts dad ir quella via?! – Era sche nus vein forsa breigias cun quels plaids, els stattan egl evangeli dad oz e duein dar da patertgar a nus.
Malgrad la radicalitad da ses plaids, han certins (sco p.ex. sogn Francestg d’Assisi ni Fra Clau da Flia) priu serius ei ed ein sespruai da viver quella pretensiun digl evangeli. Ual lur veta e lur exempel han fascinau biars e han dau impuls per l’atgna veta religiusa: Tgei drovel jeu per viver? Tgei ei ballast e tgei sai jeu schar davos mei per suandar Niessegner? Sin tgei baghegiel jeu mia veta, savend che tut il terrester ei mo confidau a nus per in cert temps?
Era sche nus lein ni savein buca viver quella radicalitad, fa ei tuttina bein da sedumandar mintgaton, tgei che impedescha nossa via tier Diu e nua che nus stuein bandunar vias e disas che meinan nus naven digl essenzial.
Lc 14,25–33
25Grondas roschas mavan cun Jesus. Cheu eis el seviults ed ha detg ad els: 26Sch’enzatgi vegn tier mei ed odiescha buca bab e mumma, dunna ed affons, frars e soras e perfin si’atgna veta, sa el buc esser miu giuvnal. 27Tgi che pren buca sia crusch sin sesez e suonda mei, sa buc esser miu giuvnal.
28Tgi da vus che vul baghegiar ina tuor, sesa buc igl emprem e calculescha ils cuosts, schebein ei tonschi per finir ella? 29Ha el numnadamein tschentau il fundament e sa buca finir il baghetg, entscheivan tut quels che vesan quei a far beffas e dir: 30Quei um ha entschiet a baghegiar ed ha buca saviu finir! 31Ni tgei retg che vul ir a far uiara encunter in auter retg, sesa buc igl emprem e ponderescha, schebein el seigi el cass dad ir cun dieschmelli umens encunter quel che vegn cun vegnmelli? 32Cass cuntrari tarmetta el ina delegaziun, tochen che l’auter ei aunc dalunsch, e damonda las cundiziuns da pasch. 33Aschia sa negin da vus esser miu giuvnal, sch’el sesparta buca da tut quei ch’el posseda.
