da Andri Casanova-Baumgartner
A caschun d’ina tschavera ha Jesus raquintau ina semeglia, ch’ins sto pia era leger sco semeglia: Las «nozzas» fan allusiun al reginavel da Diu. Dieus ei quel ch’envida. «In pli niebel» semuossa tenor las valurs dil reginavel da Diu sco in pauper, in mendus, schirau ni tschiec. Dieus envida pia ad in auter mund, in mund che lai dalla vart egoissems.
Quei reginavel da Diu ei bein enzatgei futur ed escatologic, denton duei el gia ussa esser realitad. Perquei fa Jesus attents allas gastarias che vegnevan fatgas en in ravugl exclusiv. Beada ei quella e beaus ei pia quel che lai daventar il reginavel da Diu era realitad sin tiara.
Lc 14,1.7–14
1In sabat che Jesus ei ius a magliar en casa d’in parsura dils farisès, spiunavan ei ora el.
7Silsuenter ha el raquintau ina semeglia als envidai, vesend co els sescarpavan per ils emprems plazs. El ha detg: 8Sche ti eis envidaus a nozzas dad enzatgi, sche semetta buca sigl emprem plaz. In pli niebel che ti savess esser envidaus. 9E quel che ha envidau ton tei sco lez savess vegnir e dir a ti: Fai plaz a quel! E ti stuesses lu far ina seturpegiada e secuntentar cul pli davos plaz. 10Anzi, cu ti eis envidaus, semetta sil pli davos plaz, per che quel che ha envidau tei vegni e ditgi a ti: Amitg, va plinensi! Quel vegn a far honur a ti avon tut ils envidai. 11Pertgei tgi che sesaulza vegn sbassaus, e tgi che sesbassa vegn alzaus.
12Lu ha el detg siper quel che veva envidau el: Cu ti fas in gentar ni ina tscheina, sch’envida ni tes amitgs ni tes frars ni tes parents ni vischins beinstonts, schiglioc envidan els era tei enzacu, e ti has la recumpensa. 13Cu ti fas ina gastaria, envida plitost paupers, mendus, schirai e tschocs. 14Beaus eis ti, pertgei els san buca recumpensar tei. Persuenter vegns ti remuneraus il di dalla levada dils gests.
