da sora Maria Vincenz
En quei capetel metta Jesus danovamein avon egl a ses giuvnals, tgei che suandar el vul dir.
Las expressiuns en quei text irriteschan nus oz, tonpli fetg che nus enconuschein in auter Jesus – in Jesus amitg dils carstgauns, dils paupers e malsauns, plein carezia per tuts, in che vul la pasch. Ed ussa quels plaids. Quels anflein nus ozildi plitost tier ils terrorists ed ideologists, ils quals vulan sfurzar si lur ideas ad auters. – Pertgei plaida Jesus aschia?
El Veder Testament vegn il maletg dil fiug duvraus pil giuvenessendi. Jesus drova quei maletg pigl «avegnir dil reginavel da Diu». Igl ei il temps dalla dertgira, dalla purificaziun, dalla decisiun. Plinavon fa Jesus danovamein attents nus, nua che sia via meina el: «el pitir e murir!» Igl ei in sfundrar, sco in bastiment che va sutsura. Detg cun auters plaids: «Jeu stoi ir tras quella stgira experientscha. Jeu sesanflel en ina profunda tensiun, avon che jeu sai sortir sco victur!» – La crusch stat adina avon el.
Cun siu vegnir ei era discordia nunevitabla! Puspei detg cun auters plais: La decisiun per Jesus sa metter carstgauns, amitgs … in encunter l’auter.
Lc 12,49–53
49Jeu sun vegnius per purtar fiug sin tiara, e con bugen vess jeu ch’el fuss gia envidaus! 50Jeu stoi retscheiver in batten, e tgei anguoscha che jeu hai tochen ch’igl ei cumpleniu!
51Carteis vus che jeu seigi vegnius per purtar la pasch sin tiara? Na, jeu ditgel a vus: Plitost la discordia. 52Da cheu naven vegn ei ad esser aschia: Sche tschun ein en ina casa, vivan els en discordia, treis encunter dus e dus encunter treis; 53il bab encunter il fegl ed il fegl encunter il bab, la mumma encunter la feglia e la feglia encunter la mumma, la sira encunter la brit e la brit encunter la sira.
