dad Ursicin G. G. Derungs-Bartolomei
Il raquen de Marta e Maria s’auda denter ils pli enconuschents ord igl evangeli. E forsa era denter ils pli commentai – ed ils pli malcapi. Ella tradiziun cristiana ein quellas duas dunnas daventadas figuras simbolicas per la veta activa (Marta) e la veta contemplativa (Maria). Ils uordens monastics contemplativs ein sereferi sin la figura de Maria che teidla giudapeis al Segner il plaid de Diu. Da tschei maun fuss Marta deputada da Jesus sco figura simbolica della veta activa. Mo igl ei buc aschia! Oravontut ei Maria dapli che mo figura contemplativa. Giudapeis al Rabbi steva il discipel. Cheu vein nus Maria sco discipla alla pari culs discipels. E lu Marta. Ella survegn buca ina part, ina «rolla» el giug evangelic, paralella a quella de Maria. Anzi, ella vegn criticada ella mesira ch’ella semetta en concurrenza cul tedlar il plaid de Diu! «Pertgei mo ina caussa ei necessaria» (Siu survetsch ei secapescha impurtonts; quei ei presupponiu, mo ei cheu buca in tema evangelic).
E la finala: «far quitaus per bia caussas»: quei ha ina significaziun generala, humana, buca mo evangelica. Igl ei la malsogna dil «buca saver viver», da cuorer suenter «bia caussas», da perder sesez – aunc avon che perder il Plaid de Diu.
Lc 10,38–42
38Mond vinavon, eis el vegnius en in vitg. Ina femna cun num Marta ha retschiert el en sia casa. 39Ella veva ina sora cun num Maria che seseva giudapeis al Segner e tedlava ses plaids. 40Marta denton era fetg fatschentada cun survir. Ella ei vegnida neutier ed ha detg: Segner, emporta ei nuot a ti che mia sora lai survir mei persula? Di tonaton ad ella da gidar mei. 41Cheu ha il Segner rispundiu ad ella: Marta, Marta, ti fas quitaus e fastedis per bia caussas. 42Denton pauc ei necessari, atgnamein ina suletta caussa. Maria ha eligiu la megliera part; quella vegn buca prida dad ella.
