da Marcel Köhle
«Tgei stoi jeu far?», damonda in mussader dalla lescha sco emprem Niessegner e sco secund: «E tgi ei miu proxim?»
Sill’emprema damonda sa el sez dar risposta, cunquei ch’el enconuscha la risposta ord las leschas dil Veder Testament (Dt 6,5 e Lev 19,18). Silla secunda damonda rispunda Jesus culla enconuschenta semeglia dil Samaritan misericordeivel.
En quella semeglia survegn il mussader, mo era nus, in’idea concreta tgi che nies proxim ei: Nies proxim ei quel che drova nies agid, senza risguard a derivonza ni sentiments. Ad el essan nus il proxim. Il «proxim», il qual nus entupein, ei buca mo igl «jester» ni «l’auter»; el ei il carstgaun, el qual Dieus vegn damaneivel a nus.
Ual quei evangeli sa dar a nus in u l’auter impuls davart la misercordia divina, mo era co nus savein esser misericordeivels in cun l’auter.
Lc 10,25–37
25Ed uarda, cheu ei in mussader dalla lescha che leva metter Jesus sill’emprova, vegnius neutier ed ha detg: Mussader, tgei stoi jeu far per gudignar la veta perpetna? 26El ha detg: Tgei stat ei scret ella lescha? Tgei legias ti leu? 27L’auter ha rispundiu: Ti dueis carezar tiu Diu da tut tiu cor, da tut ti’olma, da tut tia forza e da tut tiu spért; e tiu proxim sco tetez. – 28Endretg has ti rispundiu, ha Jesus detg, fai quei e ti vegns a viver.
29Mo el, vulend segiustificar, ha detg a Jesus: E tgi ei miu proxim? 30Jesus ha priu il plaid e detg: In um ei ius da Jerusalem giu a Jerico e curdaus els mauns da rubadurs; quels han sblundergiau e bastunau el ed ein lu i per lur fatg, laschond anavos el mez morts. 31Casualmein ei in sacerdot descendius per quella via, ha viu el ed ei ius sperasvi. 32Medemamein ei era in levit vegnius en quei liug, ha viu el ed ei ius sperasvi. 33In Samaritan denton che fuva sin viadi ei vegnius en quei liug, ha viu el e giu cumpassiun. 34El ei s’approximaus, ha enfaschau sias plagas, derschend sissu vin ed ieli, ha alzau el sin siu asen da sauma, menau el ella casa d’albiert e giu quitau dad el . 35L’auter di ha el priu ora dus denars, ha dau quels agl ustier e detg: Hagies quitau dad el, e quei che ti drovas dapli, vi jeu pagar a ti, cu jeu tuornel. 36Qual da quels treis para a ti d’esser staus il proxim da quel ch’era vegnius a mauns als rubadurs? 37Il mussader dalla lescha ha detg: Quel che ha fatg misericordia cun el. E Jesus ha detg ad el: Va e fai era ti il medem.
