da sora Maria Vincenz
«Tgi scheis vus che jeu seigi?» (Lc 9,20) – Ina damonda fetg directa en in mument fetg decisiv ella veta da Jesus. Jesus sesanfla numnadamein sin via viers Jerusalem (Lc 9,51). El sa tgei che spetga leu sin el e la risposta ei da gronda impurtonza. El sa ch’el vegn a murir vid la crusch. Mo avon ch’igl ei schi lunsch vul el saver, schebein enzatgi ha enconuschiu el, ha capiu el. El vul saver tgei che la glieud di e tegn dad el, q.v.d. lur meini. El giavischa in «feed-back»! Quella risposta ei impurtonta. Survegn el negina u ina risposta plitost ortga, lu sa el che sia missiun ha purtau negin fretg. Ei la risposta perencunter positiva, lu sa el che siu plaid ha pudiu dar fiug en in u l’auter cor dils auditurs e che quei fiug vegn mai a stizzar. Co po Jesus ver selegrau cu Pieder ha confessau : «Ti eis igl Unschiu da Diu!» Ussa sa Jesus che sia missiun ei buca stada per nuot.
Mo Jesus vul aunc saver dapli. El vul buca mo il meini collectiv, mobein ina risposta persunala. «Tgi sun jeu per tei?» Ils giuvnals vesevan en Jesus il Messias che vegn a reger sur Israel. Quei plan vegn destruius. Jesus vegn a pitir e murir, vegn mazzaus (v.22). E lu di el als giuvnals: «Sch’enzatgi vul esser miu giuvnal, sto el snegar sesez…» (v.23–26).
Jesus damonda era nus: «Tgi sun jeu per tei N.?» El fida a nus che nus dettien ina risposta persunala e sincera.
Lc 9,18–24
18In di che Jesus fageva oraziun en in liug solitari, ha el dumandau ses giuvnals che fuvan cun el: Tgi di il pievel che jeu seigi? 19Els han rispundiu: Gion Battesta. Auters manegian che ti seigies Elia, ed aunc auters che in dils vegls profets seigi levaus da mort en veta. – 20E vus, ha el detg, tgi scheis vus che jeu seigi? Cheu ha Pieder priu il plaid e detg: Igl Unschiu da Diu. 21El denton ha dau ad els il rigurus camond da dir quei a negin.
22Ed el ha detg: Il Fegl dil carstgaun sto pitir bia, el vegn sbittaus dils vegls, dils premsacerdots e mussaders dalla lescha, el vegn mazzaus, mo il tierz di vegn el a levar da mort en veta.
23Silsuenter ha el detg a tuts: Sch’enzatgi vul esser miu giuvnal, sto el snegar sesez, prender mintgadi sia crusch e suandar mei. 24Pertgei tgi che vul salvar sia veta, lez piarda ella. Mo tgi che piarda sia veta per amur da mei, lez salva ella.
