da sur Martin Bearth
Savens capin nus bia plaids ed ovras d’in concarstgaun ch’ei ius cun nus il viadi terrester pér pli tard e mo tec a tec. La medema experientscha han era ils giuvnals da Jesus fatg. Ils evangelis raquentan mintgaton ch’els hagien buca capiu ni ils plaids ni las ovras da Jesus ed oravontut buca sia mort e levada. Ei han duvrau agid. Jesus empermetta ad els il Gidonter, il sogn Spert.
Jeu smarvegliel adina cu jeu legel ils Fatgs dils apostels, cun tgei sabientscha, franchezia e perschuasiun ch’els perdegian suenter Tschuncheismas, suenter la vegnida dil sogn Spert. Senza tema dattan ei perdetga da quei ch’ei han viu ed udiu.
Quei bien e sabi Gidonter vein era nus retschiert el s. Batten. El ei era per nus in fidau e fideivel cumpogn da viadi, sche nus mein tras nos dis e nos onns ensemen cun el.
Gn 16,12–15
12Aunc bia hai jeu da dir a vus, mo ussa pudeis vus buca supportar. 13Mo cu el vegn, il Spert dalla verdad, lu vegn el ad introducir vus ell’entira verdad. Pertgei el vegn buc a plidar orda sesez, mobein quei ch’el auda vegn el a plidar e quei che ha da vegnir vegn el ad annunziar a vus. 14El vegn a glorificar mei, pertgei da quei ch’ei miu vegn el a prender ed annunziar a vus. 15Tut quei ch’il Bab ha ei miu; perquei hai jeu detg: Da quei ch’ei miu pren el ed annunzia a vus.
