da Marcel Köhle
Suenter che Jesus ha lavau ils peis a ses giuvnals, annunzia el che l’ura dalla passiun vegn era ad esser l’ura dalla glorificaziun. Sch’el tschontscha dalla glorificaziun, lu manegia el quella «experientscha» nua che la preschientscha da Diu vegn veseivla.
Ual egl evangeli dad oz di Niessegner che quella experientscha vegn «veseivla» e «palpabla» el niev camondament ch’el dat a ses giuvnals: «Carezei in l’auter.» – La carezia vegn d’ina vart veseivla ella relaziun denter Diu e siu Fegl, mo dall’autra vart era en nossas relaziuns. Sche nus vivin quella carezia, aschia igl evangeli, lu daventein nus perdetgas e giuvnals da Niessegner.
Aschia daventa igl evangeli dad oz danovamein in impuls per nies mintgadi! – Vivin nus quei camondament? Nua realisein nus quella carezia en nies mintgadi? Ein nossas cuminonzas cristiana propi perdetgas da quella carezia?
Gn 13,31–35
31Suenter che Judas ei staus giuado, ha Jesus detg: Ussa ei il Fegl dil carstgaun glorificaus, e Dieus ei glorificaus en el. 32Sche Dieus ei glorificaus en el, vegn Dieus era a glorificar el en sesez, ed el vegn a glorificar el beingleiti. 33Mes affons, mo aunc cuort temps sun jeu cun vus. Vus vegnis ad encurir mei, mo quei che jeu hai detg als Gedius, quei ditgel jeu ussa era a vus: Nua che jeu mon, saveis vus buca vegnir. 34In niev camondament dun jeu a vus: Carezei in l’auter; sco jeu hai carezau vus, aschia dueis era vus carezar in l’auter. 35Cheutras vegnan tuts a vegnir pertscharts che vus essas mes giuvnals, sche vus veis carezia in per l’auter.
