dad Andri Casanova-Baumgartner
Quei cuort cuort evangeli lai sminar in concentrat da profunda muntada. Mo el evochescha era damondas: Dat ei autras nuorsas che las «mias»? Van quellas autras lu forsa a piarder? Tgei ha il Bab dau al Fegl? La passascha dat buca claras rispostas. Ella dat da patertgar.
Igl evangeli tenor Gion drova meinsvart cuntrasts: glisch e stgiradetgna, veser ed esser tschocs, cardientscha e nuncardientscha, veta e mort. Ils differents disputs cun ils «Gedius» enteifer igl evangeli tenor Gion cudezzan ual tals cuntrasts, talas polaritads. Gie, schizun quels schinumnai «Gedius» ein part d’in cuntrast, pertgei Gedius ein era ils giuvnals da Jesus. Egl evangeli tenor Gion ein quels «Gedius» pia ils tschocs, ils nuncartents.
Quei text cheu deriva medemamein d’in tal disput cun ils «Gedius». La finala savein nus sco lecturs capir – pass per pass – che Jesus Cristus ed il Bab ein units. Nus savein sedecider e tedlar sia vusch. El dat numnadamein veta perpetna. Negin vegn a sdrappar nus ordamaun al Fegl, ordamaun al Bab. Il maun dil Fegl ei era il maun dil Bab.
Gn 10,27–30
27Mias nuorsas teidlan mia vusch; jeu enconuschel ellas, ed ellas suondan mei. 28Jeu dun veta perpetna ad ellas; ellas vegnan mai ad ir a piarder, e negin vegn a sdrappar ellas ordamaun a mi. 29Il Bab che ha dau ellas a mi ei pli gronds che tuts, e negin sa sdrappar ellas ordamaun a miu Bab. 30Jeu ed il Bab essan units.
