da Marcel Köhle
El capetel precedent digl evangeli da Lucas plaida Jesus dalla urgentadad dalla conversiun. Cheu, en quei passadi digl evangeli prenda Niessegner il rapport dalla mazzacra sco caschun dad admonir aunc inaga ses auditurs.
Jesus di che quella tragedia vess saviu schabegiar a mintgin da nus. Negin sa ed astga sesentir segirs. Perquei duein nus adina puspei encurir la via tier Diu e seconverter. Tgi che fa quei pass, quel mida sia moda da viver e patertgar, e vegn a purtar fretgs che plaian a Diu.
Quella admoniziun vegn exprimida ella semeglia dil figher che nus udin era egl evangeli da questa dumengia. Cheu daventa il figher in simbol che Dieus schenghegia a nus il temps da grazia sco nova schanza da seconverter. E quella schanza duein nus buca schar passar.
Lc 13,1–9
1Da quei medem temps ein entgins vegni ed han rapportau ad el, co Pilatus hagi spons il saung da Galilès, ferton ch’els fagevan lur unfrendas. 2Cheu ha el rispundiu ad els: Manegeis vus forsa che quels Galilès seigien stai pli gronds pucconts che tut ils auters Galilès, perquei ch’els han stuiu pitir quei? 3Na, ditgel jeu a vus; e sche vus mideis buca patratg, meis vus tuts en semeglionta maniera alla malura. 4Ni quels schotg che la tuor da Siloa ha satrau e mazzau, carteis vus che quels hagien giu dapli cuolpa che tut ils auters avdonts da Jerusalem? 5Na, ditgel jeu a vus; e vus tuts meis en medema maniera alla malura, sche vus mideis buca patratg. 6Lu ha el raquintau ad els sequenta semeglia: In um veva plantau in figher en sia vegna. EI ei vegnius per encurir giu fretgs, mo ha anflau negins. 7Cheu ha el detg al vignerol: Treis onns vegn jeu gia per encurir fretgs vid quei figher ed anflel negins. Derscha entuorn el! Pertgei duei el tschitschar ora il terren? 8Mo il vignerol ha rispundiu: Signur, lai el aunc uonn. Jeu vi scavignar il tratsch entuorn el e metter cultem. 9Forsa ch’el porta lu fretg. Cass cuntrari sas ti pinar el.
