dad Andri Casanova-Baumgartner
Jesus vegn transfiguras duront ch’el urava sil cuolm (cf. Lc 9,29). Quei cuort raquent ei circumdaus da renviaments sin la passiun, mo era il text sez cuntegn talas allusiuns. Malgrad la tarlischur dil vestgiu san ins udir la passiun che vegn a vegnir: Jerusalem, ils giuvnals che sedurmentan, l’umbriva, Jesus ch’ei persuls, ils giuvnals che queschan.
Il punct culminont dil raquent ei la vusch che tuna ord la nebla e ch’annunzia: «Quei ei miu Fegl eligiu, quel tedlei!» (Lc 9,35). Jesus vegn gia annunziaus tier la naschientscha sco «Fegl da Diu» (cf. Lc 1,31.35), e lu tier il batten (cf. Lc 3,22), mo era tier las tentaziuns el desiert (cf. Lc 4,3.9) ed entras demunis ed in malspirtau (cf. Lc 4,41; 8,28).
Cun la transfiguraziun vegn in schatg digl esser divin da Jesus «veseivels», e quei amiez las allusiuns alla passiun. Mo sia passiun, insumma sia entira veta terrestra, ei ina via alla levada, alla gloria.
Lc 9,28b–36
28bJesus ha priu cun el Pieder, Giachen e Gion ed ei ius sin il cuolm per urar. 29E ferton ch’el urava, ei l’expressiun da sia fatscha semidada, e siu vestgiu tarlischava tut alv. 30Ed uarda, dus umens sediscurrevan cun el: Moses ed Elia. 31Cumpari en gloria, plidavan ei da sia fin che dueva secumplenir a Jerusalem. 32Pieder e ses cumpogns eran sedurmentai. Stai allerta, han ei viu sia gloria ed ils dus umens che plidavan cun el. 33Quels stevan per bandunar el. Cheu ha Pieder detg a Jesus: Mussader, igl ei bien che nus essan cheu. Nus lein far treis tendas, ina per tei, ina per Moses ed ina per Elia. EI saveva buca tgei ch’el scheva. 34Ferton ch’el plidava aschia, ei ina nebla vegnida ed ha fiers umbriva sin els. Entrond ella nebla, han ei pigliau tema. 35Ed ord la nebla ha ina vusch tunau: Quei ei miu Fegl eligiu, quel tedlei! 36E cu la vusch ha giu resunau, fuva Jesus persuls. Ils giuvnals han cuschiu sur da quei ch’els vevan viu ed han da gliez temps raquintau nuot a negin.
