da Flurina Cavegn-Tomaschett
Igl evangeli da questa dumengia fa ina punt tier il batten da Jesus el Jordan (Lc 3,21–22). Suenter siu batten seretrai el anavos el desiert per anflar forza per la via che stat avon el, la via sco annunziader dil Reginavel da Diu. Leu stat el curonta dis, pia gest il temps che schai era avon nus entochen la fiasta da Pastgas. En quei liug solitari vegn el mess treis ga sin l’emprova dil giavel.
Il giavel (diabolos) fa tutta honur a siu num che munta en grec, pia il lungatg original dil text: «quel che fiera tut in denter l’auter». Cun ses plaids: «Sche ti eis il Fegl da Diu» sereferescha il giavel al batten da Jesus, nua che la vusch dil tschiel ha plidentau el sco «Fegl carezau». Il giavel ha in cert maletg da quei ch’il Fegl da Diu havess dad esser e metta lez corrispundentamein sin l’emprova.
Las rispostas da Jesus perschuadan da siu status sco Fegl da Diu; ellas ein ruasseivlas e suveranas. El sereferescha sin plaids ord il Veder Testament ed exprima cheutras, ch’el anfla lien forza per renunziar allas tentaziuns dil giavel. La passascha, ch’ei tenida per gronda part en discuors direct, muossa che buc il giavel, mobein Jesus ha il davos plaid el capetel.
Lc 4,1–13
1Jesus, pleins dil Spert sogn, ei turnaus anavos dil Jordan e vegnius menaus dil Spert duront curonta dis per il desiert entuorn, 2nua ch’el ei vegnius tentaus dil giavel. Tut quels dis ha el magliau nuot. Mo cura ch’els ein stai vargai, veva el fom. 3Cheu ha il giavel detg ad el: Sche ti eis Fegl da Diu, camonda a quei crap da daventar paun. 4Mo Jesus ha rispundiu ad el: Ei stat scret: Il carstgaun viva buca mo da paun. 5Lu ha il giavel menau Jesus ad ault, mussau ad el en in mument tut ils reginavels dil mund 6e detg ad el: Jeu vi dar a ti tut la pussonza e la gloria da quels reginavels, pertgei ella ei dada a mi, e jeu dun ella a tgi che jeu vi. 7Sche ti sefieras ussa en schanuglias avon mei, duei ella udir dil tuttafatg a ti. 8Mo Jesus ha rispundiu ad el: Ei stat scret: Ti dueis adurar il Segner tiu Diu e survir mo ad el. 9Cheu ha el menau Jesus a Jerusalem e tschentau el sil spitg dil tempel e detg: Sche ti eis Fegl da Diu, sefiera cheu surengiu! 10Pertgei ei stat scret: Per amur da tei dat el camond a ses aunghels da pertgirar tei, 11ed els portan tei sin maun, che ti scarpetschies buca cun tiu pei en in crap. 12Mo Jesus ha rispundiu ad el: Ti dueis buca empruar il Segner tiu Diu. 13E staus alla fin cun tuts empruaments, ei il giavel untgius dad el per in temps.
