da sora Maria Vincenz
Il secuntener dil carstgaun ei sco in spieghel che muossa sia intenziun e tenuta interna. Jesus dat oz entginas reglas sco in manual sin via da mintga di. Quellas reglas ein sco curals en ina corda. Cheu fa el attents ch’il scolar stat buca sur il magister, quei vul dir: nus savein dar vinavon mo quei che nus vein en nus. – Plinavon descriva Jesus cun in tec humor la semeglia dalla spriula e la trav. Nus vein negin dretg da truar enzatgi. – Il carstgaun ei quei ch’el ei, e suenter quei vegn el miseraus: igl exempel che nus dein, ei decisivs – In auter cural di clar: Negin sa discuorer sur da Diu, sch’il Spert da Diu ei buca en siu cor. – La semeglia dil pumer ei clara: U ch’in pumer porta buns fretgs ni schliats, il secuntener dil carstgaun muossa sia intenziun. – Resumau il text dad oz: Nossa intenziun e la misericordia viers nies concarstgaun ei decisiva!
Lc 6,39–45
39El ha aunc detg ina semeglia ad els: Sa forsa in tschiec menar in tschiec? Vegnan buca domisdus a curdar en in foss? 40Il giuvnal stat buca sur il mussader. Mintgin, era sch’el ha empriu tut, ei mo sco siu mussader. 41Tgei vesas ti la spriula en igl egl da tiu frar? E la trav en tiu egl observas ti buc! 42Co sas ti dir a tiu frar: Frar, spetga, jeu prendel la spriula ch’ei en tiu egl, ferton che ti observas buca la trav en tiu egl? Ti simulader! Tila igl emprem la trav ord tiu egl, lu vesas ti da prender la spriula ord igl egl da tiu frar. 43Ei dat buc in bien pumer che porta schliats fretgs, mo era buc in pumer marsch che porta buns fretgs. 44pertgei mintga pumer enconusch’ins vida ses fretgs. Ins enquera buca figs giu dils carduns e buca iuas giu dalla spinatscha. 45Il bien carstgaun pren bunas caussas ord il bien tresor da siu cor; il schliet carstgaun pren schliatas caussas ord il schliet tresor. Pertgei da quei ch’il cor ei memia pleins plaida la bucca.
