da sur Martin Bearth
En quei evangli pretenda Jesus fetg bia da tut quels che vulan suandar el, pia era da mintgin e mintgina da nus. El pretenda da carezar ils inimitgs, da far dil bien a quels che odieschan nus, da benedir quels che smaledeschan nus, dad urar per quels che offendan nus…
Nus seigien affons digl Altissim e dueien perquei esser misericordievels sco nies Bab ei misericordievels. Nos inimitgs ein era tut quels che persequitschan e schizun mazzan mintg’onn mellis cristifideivels ch’ein gie era nos frars e nossas soras. Il renomau politicher engles Chesterton ha detg suenter la davosa uiara mundiada: «Il perdunar ei ina dallas grondas prestaziuns dil carstgaun.» Carezar inimitgs ei grev e pretenda bia temps e pazienzia, stenta e fidonza egl agid da Diu. L’oraziun ei in fetg grond agid sin quella via.
Lc 6,27–38
27Mo a vus che tedleis ditgel jeu: Carezei vos inimitgs, fagei dil bien a quels che odieschan vus, 28benedi quels che smaledeschan vus, urei per quels che offendan vus. 29A quel che dat a ti sin ina vesta, tegn vi era l’autra, ed a quel che vul ir cun tiu manti, lai era tiu vestgiu. 30A scadin che roga tei, dai; e quel che pren dil tiu, fai buca turnar. 31E sco quei che vus leis ch’ils auters fetschien a vus, aschia fagei era vus ad els. 32Sche vus carezeis numnadamein mo quels che carezan vus, tgei engraziament meriteis lu? Carezan gie era ils pucconts quels che carezan els. 33E sche vus fageis dil bien mo a quels che fan dil bien a vus, tgei engraziament meriteis lu? Gliez fan era ils pucconts. 34E sche vus empristeis mo a quels che vus spereis ch’els dettien puspei anavos, tgei engraziament meriteis lu? Era ils pucconts emprestan a pucconts per retscheiver puspei il medem. 35Il cuntrari: Carezei vos inimitgs, fagei dil bien ed empristei senza spitgar anavos enzatgei, e vossa pagaglia vegn ad esser gronda, e vus vegnis ad esser affons digl Altissim, pertgei el ei buns era cun ils malengrazieivels e schliats.
36Seigies misericordeivels sco vies Bab ei misericordeivels. 37Buca giudichei, lu vegnis era vus buca giudicai. Buca condemnei, lu vegnis era vus buca condemnai. Perdunei, lu vegn ei perdunau era a vus. 38Dei, sche vegn ei dau era a vus; ina buna mesira, tgemblada, stagnada, che va suro vegn ins a dar el scussal a vus. Pertgei cun la mesira che vus mesireis, vegn ins a mesirar era a vus.
