dad Ursicin G. G. Derungs-Bartolomei
Jesus sepresenta ella sinagoga de Nazaret, siu marcau nativ. Ei dattan ad el da leger ord il profet Jesaja: il Spert dil Segner ei sur mei per purtar la buna nova als paupers, per dar la vesida als tschocs. El di: Oz ei quei plaid secumplenius. Ei dat in grond scandel. «Ei quei buc il fegl de Giusep?» E Jesus: «Buc in profet ei beinvesius en sia patria.»
Setracta ei d’in pregiudezi, il solit pregiudezi che tucca quels ch’ein enconuschents, mo ein buca «sco tschels»? Na, ei setracta è buca da malcapientscha. Sco da dir: Sche Jesus fuss fegl d’in renomau doctur della lescha, fuss tut clar! Ei setracta da nuncapientscha. Pertgei l’autoritad ch’ins ha ni ha buc, aschia di Jesus, vegn buca neu da pli u meins impurtontas parentellas. Ella genealogia de Jesus (Mt 1,1–17) dat ei buca «prers, paders, muniessas», mobein pitaunas ed umens pucconts assassins (buca meins che retg David che fa mazzar Uria!). Sche Jesus di: Il Spert dil Segner ei sur de mei, e: oz ei quei plaid secumplenius, lu sa mintga mument esser igl «oz» ni igl «uss» della grazia de Diu, independentamein da pregiudezis è religius ni da derivonzas. Quei capeschan ses convischins buc. Perquei han ei vuliu encarpar el. Quei capin è nus mo vess.
Lc 4,21–30
21Ed el ha entschiet a dir ad els: Oz ei secumplenius quei plaid dalla Scartira che vus veis udiu. 22E tuts han applaudiu ad el ed ein sesmarvigliai dils plaids legreivels che vegnevan da sia bucca. Ed els schevan: Ei quei buc il fegl da Giusep? 23Cheu ha el rispundiu ad els: Senza dubi vegnis vus a citar a mi il proverbi: Miedi, medeghescha tetez! Fai era cheu en tia patria da quellas ovras, sco nus vein udiu ch’ellas seigien daventadas a Cafarnaum! 24Lu ha el aunc detg: En verdad, jeu ditgel a vus: Buc in profet ei beinvesius en sia patria. 25Daveras, jeu ditgel a vus: Bia vieuas ha ei dau en Israel dil temps d’Elia, cura ch’il tschiel ei staus serraus per treis onns e sis meins, ed in grond fomaz ei vegnius sur tut la tiara. 26Denton tier buc ina dad ellas ei Elia vegnius tarmess, mobein sulettamein tier ina vieua a Sarepta ella cuntrada da Sidon. 27E bia leprus ha ei dau en Israel dil temps d’Elisa, denton buc in dad els ei vegnius purificaus dano Naaman dalla Siria.
28Udend quei, ein tuts ella sinagoga vegni plein gretta. 29Els ein sigli en pei ed han fiers el giuado dil marcau. Lu han ei stuschau el osum il grep, sin il qual lur marcau fuva baghegiaus, per spuranar surengiu el. 30Mo el ei passaus permiez els ora ed ius per siu fatg.
