da Marcel Köhle
Lucas tschenta all’entschatta da siu evangeli ina cuorta introducziun. En quella descriva igl autur, tenor tgei principis ch’el ha scret quei text: «Aschia sun era jeu – suenter esser s’informaus manedlamein da tut dapi l’entschatta – sedecidius da metter per scret ils fatgs in suenter l’auter.» Cun quella empermischun d’haver retschercau bein, surdat Lucas siu text d’evangeli ad in lectur che senumna Teofilus. Il plaid grec «theophilos» munta «amitg da Diu».
Biars scienziai dalla Bibla menziuneschan en quei context che Lucas s’adressa buc ad ina persuna concreta cul num Teofilus, mobein a tut quels che legian igl evangeli sco «amitgs da Diu».
Era nus essan adina puspei envidai dad udir e tedlar il plaid da Diu sco ses amitgs, il qual duei gidar nus da metter nossa cardientscha sin in bien fundament che porta nus tras il mintgadi.
Lc 1,1–4; 4,14–21
1Gia biars han empruau da dar in rapport dils eveniments ch’ein succedi en nies miez. 2Els ein sebasai sils raquens da quels ch’ein sezs stai perdetga d’entschatta enneu e daventai survients dil plaid. 3Aschia sun era jeu – suenter esser s’informaus manedlamein da tut dapi l’entschatta – sedecidius da metter per scret ils fatgs in suenter l’auter per tei, zun stimau Teofilus. 4Cheutras sas ti seperschuader che l’instrucziun che ti has retschiert ei beinfundada.
14E Jesus ei returnaus ella forza dil Spert en Galilea. E la nova dad el ei serasada per tut la cuntrada. 15El instrueva en lur sinagogas e vegneva glorificaus da tuts. 16El ei era vegnius a Nazaret, nua ch’el era carschius si. E tenor sia isonza eis el ius il sabat ella sinagoga ed ei levaus en pei per leger avon. 17Ins ha purschiu ad el il cudisch dil profet Jesaja. Arvend il cudisch, ha el anflau il liug, nua ch’ei stat scret:
18Il Spert dil Segner ei sur mei, pertgei el ha unschiu mei.
El ha tarmess mei per purtar la buna nova als paupers,
per annunziar liberaziun als perschuniers
e la vesida als tschocs,
per dar la libertad als squitschai. 19ed annunziar in onn da grazia dil Segner.
20Ussa ha el serrau il cudisch, ha turnau el al survient ed ei sesius. Ils egls da tut quels ella sinagoga fuvan drizzai sin el. 21Ed el ha entschiet a dir ad els: Oz ei secumplenius quei plaid dalla Scartira che vus veis udiu.
