dad Andri Casanova-Baumgartner
L’emprema impressiun da quest evangeli po esser: Jesus ha fatg ina miracla ed ha midau aua en vin. Mo igl evangelist Gion descriva en quei raquent enzatgei pli profund. Siu entir evangeli persequitescha dad annunziar Jesus sco il Cristus, il Messias. Igl evangeli vul pia manifestar la gloria da Jesus (cf. Gn 2,11), pia che Jesus hagi ina derivonza divina, ch’el seigi tarmess dil Bab (cf. Gn 7,28–30).
Sch’ei vegn pia surviu allas nozzas a Cana il bien vin pér alla fin, sche fa quei era allusiun al Messias che cumpara alla fin dils temps. Neu dalla tradiziun giudaica representa il vin
l’abundonza e la grazia che vegn regalada dil Messias. E quei Messias ei Jesus. El ha introduciu il temps dil salit e spindrament, in temps che vala era per nus oz. E quei ei dapli che mo
in’impressiun.
Gn 2,1–11
1Treis dis pli tard fuva ei nozzas a Cana en Galilea, e la mumma da Jesus fuva leu. 2Era Jesus e ses giuvnals fuvan envidai a nozzas. 3Mond il vin alla fin, ha la mumma da Jesus detg ad el: Ei han buca vin pli. 4Jesus rispunda ad ella: Tgei vul ti da mei, dunna? Mia ura ei aunc buca vegnida. 5Sia mumma di als survients: Quei ch’el di a vus, fagei!
6Leu fuvan sis ruogs da tiaracotga per la purificaziun, sco ella fuva usitada tier ils Gedius; mintgin dad els teneva duas ni treis mesiras. 7Jesus di als survients: Empleni ils ruogs cun aua! Ed ei han empleniu els toccasum. 8Ed el di ad els: Ussa prendei da quei e purtei al cautabla! Ed els han purtau. 9Il cautabla ha schigiau l’aua ch’era daventada vin, mo el saveva buca danunder ch’il vin seigi; ils survients denton che vevan purtau l’aua savevan. Cheu cloma el neutier il spus e di ad el: 10Mintgin survescha igl emprem il bien vin, e pér cura ch’ins ha buiu detgavunda, quel ch’ei meins buns. Ti denton has spargnau il bien vin tochen uss. 11Quei ha Jesus fatg a Cana en Galilea; igl ei stau l’emprema da sias enzennas. Aschia ha el manifestau sia gloria, e ses giuvnals han cartiu en el.
