da Flurina Cavegn-Tomaschett
Mo paucs dis suenter la fiasta da Buania, nua ch’ils sabis digl orient visetan il nievnaschiu retg, muossa la Baselgia a nus Jesus sco um carschiu. El va tier Gion per seschar battegiar.
Cun l’annunzia da Gion, ch’ei vegni in che battegi il pievel buca mo cun aua, mobein era cul Spert Sogn e cun fiug, arva el il horizont viaden el cristianissem. In horizont sesarva era duront il batten da Jesus: Ord il tschiel aviert vegn il Spert Sogn, veseivels buca mo per Jesus mobein per gl’entir pievel, en fuorma d’ina columba. La columba ei ida en la tradiziun cristiana sco ferm simbol pil Spert Sogn. Aschia sco la columba tuorna adina puspei anavos tier siu origin, aschia vul era il Spert da Diu adina puspei purtar nus anavos tier nies origin, tier nossa fontauna, tier nies batten.
Lc 3,15–16.21–22
15Ferton ch’il pievel fuva spanegiaus, e tuts fagevan patratgs, sche Gion savessi buca forsa esser il Messias, 16ha Gion dau ad els tuts la risposta: Jeu battegel vus cun aua. Mo quel ch’ei pli pussents che jeu vegn a vegnir. Jeu sun buca vengonzs da snuar las curegias da ses calzers. EI vegn a battegiar vus el Spert sogn ed el fiug.
21Quei temps che tut il pievel seschava battegiar, eis ei daventau che era Jesus ei seschaus battegiar. E duront ch’el fageva oraziun, ei il tschiel s’aviarts, 22ed il Spert sogn ei vegnius sur dad el en fuorma corporala sco ina columba. Ed ina vusch ha clamau giu da tschiel: Ti eis miu Fegl carezau, da tei hai jeu miu cumplascher.
