da sora Maria Vincenz
Pagauns! digl Orient, buca Gedius!, encueran cun desideri Jesus! Sabis, enconuschents ell’astrologia ed astronomia, observan in object special, ina «steila» vid il firmament. Ins carteva da quei temps fetg, ch’in regent vegni a nescher. Forsa vevan quels umens enconuschientscha dil text dil Veder Testament (p.ex. 4 Mos 24,17 ni Mi 5,1.2), nua che la vegnida da Jesus Cristus vegn gia profetisada. Quei retg vulan els encurir, anflar ed adurar!
Jerusalem ei buca semtgaus! Herodes peglia tema! Siu tron ei en prighel. Denton san ils cussegliaders confirmar che gia il profet Miha 5,1.2 hagi profetisau la naschientscha d’in regent, buca a Jerusalem, mobein a Betlehem. Il malign retg Herodes tarmetta ils sabis vinavon a Betlehem. Cun agid dalla steila anflan els il niev naschiu retg. Els salidan igl emprem Jesus e lu sia mumma ed aduran el. – Ils regals surdai regordan vid la veta da Jesus: aur pil retg, entscheins pil sacerdot, mirra pil pitir e murir. – In siemi avisescha els da buca turnar pli a Jerusalem. Fussan els turnai a Jerusalem, vessan els tradiu il liug e mess l’entira famiglia en prighel.
Mt 2,1–12
1Cura che Jesus ei naschius a Betlehem en Giudea dil temps dil retg Herodes, uarda, cheu ein sabis vegni digl Orient a Jerusalem 2ed han dumandau: Nua ei il nievnaschiu retg dils Gedius? Nus vein viu sia steila egl Orient ed essan vegni per adurar el.
3Udend quei, ha il retg Herodes pigliau tema, e tut Jerusalem cun el. 4El raduna tut ils premsacerdots e mussaders dil pievel e damonda quels, nua ch’il Messias hagi da nescher. 5Quels rispundan ad el: A Betlehem en Giudea; pertgei aschia scriva il profet:
6E ti Betlehem, tiara da Juda,
ti eis tuttavia buc il mender denter ils marcaus principals da Juda,
pertgei da tei vegn a sortir in regent,
e quel vegn a pascular miu pievel Israel.
7Sinquei cloma Herodes discusamein ils sabis e damonda els exactamein, da tgei temps che la steila seigi cumparida, 8e tarmetta lu els a Betlehem schend: Mei e tscherchei minuziusamein igl affon. Cu vus veis anflau el, dei part a mi, per che era jeu sappi ir ad adurar el. 9Suenter ver tedlau il retg ein els semess sin via. Ed uarda, la steila ch’els vevan viu egl Orient mava ordavon ad els, tochen ch’ella ei sefermada sur il liug, nua ch’igl affon fuva. 10Vesend la steila, ein els selegrai zun fetg. 11Els ein entrai en casa, han viu igl affon cun Maria, sia mumma, ed ein sefiers per tiara ed han adurau el. Lu han els scuvretg lur scazis e presentau ad el regals: Aur, entscheins e mirra. 12Ed avisai en siemi da buca turnar tier Herodes, ein els turnai per in’autra via en lur tiara.
