da sur Marcus Flury
En quei text tenor Lucas vegn il misteri da Nadal palesaus, numnadamein che Dieus daventa carstgaun ed entra ella historia. Quei misteri ha da far cugl daventar ed esser carstgaun. Maria e Giusep, ils aunghels ed ils pasturs muossan tgei ch’ei drova per saver esser carstgaun.
Maria ha parturiu in affon ed enfaschau el e mess el en in pursepen, perquei ch’ei veva buca plaz ella casa d’albiert. Per saver daventar ed esser carstgaun drov’ei carstgauns che han quitau da mei e ch’ein promts da dar enzatgei da lur intern.
Ils aunghels annunzian als pasturs ch’il Salvader seigi naschius. L’enzenna per els ei in nievnaschiu en in pursepen. Igl ei buc in’enzenna spectaculara. Dieus daventa in pign e fleivel carstgaun. Ils pasturs ein stai aviarts per quell’enzenna ed han cheutras udiu la nuviala dils aunghels: «Gloria a Diu ell’altezia e pasch sin tiara als carstgauns da sia beinvuglientscha». Dapi Nadal savein nus: Vera pasch dat ei mo, nua ch’ei vegn dau gloria a Diu, q.v.d. nua ch’il carstgaun sesenta en siu far e demanar responsabels enviers Diu.
Lc 2,1–14
1Da gliez temps ha igl imperatur Augustus dau il camond da registrar la glieud digl entir mund. 2Quei ei stau l’emprema dumbraziun ed ei vegnida fatga duront che Quirinius fuva guvernatur dalla Siria. 3E tuts mavan per seschar enscriver, mintgin en siu marcau. 4Era Giusep ha bandunau il marcau da Nazaret en Galilea ed ei serendius en Giudea el marcau da David, numnaus Betlehem, perquei ch’el era dalla casa e schlatteina da David. 5El ei vegnius per seschar enscriver ensemen cun Maria sia spusa che fuva purtonta. 6E ferton ch’els eran leu, ein ils dis secumpleni ch’ella dueva parturir. 7Ella ha parturiu siu fegl, siu empremnaschiu, ha enfaschau el e mess en pursepen, perquei ch’ei fuva buca plaz per els ella casa d’albiert.
8En quella cuntrada fuvan pasturs che manevan ordaviert e fagevan da notg guardia sper lur muntanera. 9In aunghel dil Segner ei cumparius ad els, e la gloria dil Segner ha sclariu entuorn els, ed els han pigliau gronda tema. 10Mo igl aunghel ha detg ad els: Buca temei! Mirei, jeu annunziel gronda legria a vus, e quella vegn a tschaffar tut il pievel: 11Oz ei naschius a vus el marcau da David il Salvader; quei ei Cristus il Segner. 12Ed il sequent ei per vus in’enzenna: Vus vegnis ad anflar in nievnaschiu, enfaschaus e tschentaus en in pursepen. 13E tuttenina fuva cun igl aunghel ina gronda roscha dall’armada celestiala che ludava Diu e scheva: 14Gloria a Diu ell’altezia e pasch sin tiara als carstgauns da sia beinvulientscha.
