dad Andri Casanova-Baumgartner
Igl evangelist Lucas numna detagliadamein ils differents regents che fuvan en uffeci dil temps che Jesus ha entschiet ad annunziar il reginavel da Diu. Ed el citescha el medem mument ord il cudisch dil profet Jesaja (cf. Jes 40,3–5). Aschia fa el attents sin dus aspects: Per primo ei Jesus naschius el mund, ella historia concreta, en ina situaziun concreta. E secundo fa Jesus part dalla historia dil salit, la historia denter Diu e carstgaun.
El temps d’advent essan nus tuts clamai da far uliv las vias e da metter orda peis quei ch’ei enta peis. Igl ei in temps per preparar la via al Segner, v.d. per preparar nusezs per la vegnida dil Segner. Pertgei el vegn «e tutta carn duei veser il salit da Diu» (Lc 3,6). Il Segner vul inscuntrar mintgin da nus, mintgin aschia sco el ei tschentaus en la historia, mo cun in cor aviert e drizzaus viers el.
Lc 3,1–6
1Ei fuva il quendischavel onn dalla regenza digl imperatur Tiberius. Pontius Pilatus fuva guvernatur dalla Giudea, Herodes regent dalla Galilea, siu frar Filip regent dalla Iturea e Trahonitis, e Lisanias regent dalla Abilena. 2Premsacerdots eran Hannas e Caifas. Cheu ei Gion, il fegl da Zaharias, vegnius tschaffaus dil plaid da Diu ora el desiert. 3Ed el ei ius per tut la cuntrada dil Jordan ed ha perdegau in batten da conversiun per la remischun dils puccaus, 4sco ei stat el cudisch culs plaids dil profet Jesaja:
La vusch dad in che grescha el desiert:
Preparei la via dil Segner,
fagei uliv las sendas per el!
5Mintga cavorgia vegni emplenida,
mintga cuolm e crest vegni sbassaus,
quei ch’ei uiersch vegni grad
e quei ch’ei malneidi via battida,
6e tutta carn duei veser il salit da Diu.
