da Flurina Cavegn-Tomaschett
Igl evangeli cuntegn ina part dil grond discuors profetic denter Jesus e ses giuvnals. El tematisescha la devastaziun dil tempel da Jerusalem 70 onns suenter Cristus; ina catastrofa schibein religiusa sco era politica. Jesus drova maletgs apocaliptics en fuorma dad enzennas, enconuschents a nus ord la Palentada.
Ils maletgs paran buca dad ir a prau cun il plascher che biars sentan all’entschatta digl advent. Plitost stattan els en cuntrast cun l’idilla da quei temps da preparaziun per Nadal. E tuttina: Ils plaids «Stei sidretg ed alzei vos tgaus, pertgei vies spindrament ei damaneivel» dattan curascha e speronza e gidan a mirar anavon viers igl avegnir. Els animeschan da buca star eri el stgir, mobein sedrizzar viers la glisch divina che vegn encunter a nus.
Lc 21,25–28.34–36
25Ed ei vegn a dar enzennas vid sulegl, glina e steilas. Sin tiara vegn a reger anguoscha denter ils pievels ed embrugl pervia dil fraccass dalla mar e dallas undas. 26Ils carstgauns vegnan a snarrir dalla tema en vesta da tut quei che seprepara per il mund; pertgei las forzas dil tschiel vegnan zaccudidas. 27E lu vegn ins a veser il Fegl dil carstgaun a vegnend sin ina nebla dil tschiel cun gronda pussonza e maiestad. 28Cura che quei entscheiva a daventar, stei sidretg ed alzei vos tgaus, pertgei vies spindrament ei damaneivel.
34Fagei adatg che vos cors vegnien buc engreviai cun eivradad e stuornadad e cun quitaus terresters, e che gliez di tschaffi buca vus tut anetgamein sco in latsch. 35El vegn numnadamein sur da tut ils avdonts digl entir mund. 36Vegliei pia ed urei senza calar, per che vus pudeies mitschar da tut quei che daventa e subsister avon il Fegl dil carstgaun.
