da sora Maria Vincenz
Nies text formescha la finiziun dils capetels Mc 8,22–10.46–52, ils quals descrivan igl operar da Jesus el contuorn dil lag da Gennesaret. Ei fa senn da meditar il text dad oz en quei context. Jesus sa tgei che spetga sin el. Buca per nuot enramescha Marcus la via viers Jerusalem cun duas medegaziuns da tschoccadad! Enteifer quels capetels discuora Jesus treis gadas da siu pitir, sia mort e sia levada. Ses auditurs denton vulan ni udir ni capir el. Els ein suords e tschocs per la realitad, en la quala Jesus sesanfla. Il tschiec Bartimeus perencunter vegn buca staunchels da sbatter stinadamein per vegnir medegaus, da survegnir la vesida. Igl egl dil tgierp ei tschocs, igl egl intern vesa! Aunc tschocs enconuscha el Jesus e confessa: Fegl da David, Jesus, hagies cumpassiun cun mei! Il griu per agid muenta Jesus da clamar Bartimeus tier el. Bartimeus seglia en pei, lai anavos siu manti (siu sulet possess), quei vul dir: el ei promts da suandar Jesus e survir ad el entochen la mort. Dil medegau Bartimeus, d’in sempel carstgaun agl ur dalla via, savein nus emprender da sperar e crer, da concretisar la situaziun da nossa veta e dad ir nossa via.
Mc 10,46–52
46Els ein arrivai a Jerico. E cura ch’el ha bandunau Jerico cun ses giuvnals ed ina gronda fuola, seseva agl ur dalla via Bartimeus, il fegl da Timeus, in murdiu tschiec. 47Quel ha intervegniu ch’ei seigi Jesus da Nazaret ed ha entschiet a grir: Fegl da David, Jesus, hagies cumpassiun da mei! 48E biars han sevilau sin el per far quescher el, mo el ha griu aunc pli fetg: Fegl da David, hagies cumpassiun da mei! 49Jesus ei sefermaus ed ha detg: Clamei neutier el! Ins ha clamau il tschiec, schend ad el: Curascha! Stai en pei, el cloma tei! 50E quel ha fiers naven siu manti, ei siglius en pei e vegnius tier Jesus. 51Cheu ha Jesus detg siper el: Tgei vul che jeu fetschi per tei? Il tschiec ha rispundiu: Rabbuni, che jeu vesi! 52Jesus ha detg ad el: Va, tia cardientscha ha salvau tei. Ed immediat ha el retschiert la vesida ed ei suandaus el sin siu viadi.
