da sur Martin Bearth
«Jeu sun buca vegnius per esser survius, mobein per survir» di Jesus en quei evangeli. Ed el di era: «Quel che vul esser gronds denter vus, duei esser vies survient.» Avon ina partida onns han ins anflau el sablun dil desiert egipzian ina buccada d’in vegl papirus. Sin quel stev’ei scret: «Quel che vul esser gronds denter vus, seigi vies survient.» In professer dil seminari veva detg sin quei eveniment: «Sch’ei dess dil Niev Testament mo quei sulet plaid da Jesus, fuss quei per el in motiv sufficient u per vegnir in cristifideivel ni per star in cristifideivel. – Survir a nus carstgauns ei la via che Jesus ei ius cun siu viver, siu murir e levar da mort en veta. Survir in a l’auter cun nos duns e nos talents duei era esser nossa via. Igl ei quei che dat senn, cuntegn e finamira a nies viadi terrester.
Mc 10,35–45
35Giachen e Gion, ils fegls da Zebedeus, ein s’avischinai ad el ed han detg: Mussader, nus lessen che ti fagesses per nus quei che nus rughein tei. 36El ha rispundiu ad els: Tgei leis che jeu fetschi per vus? – 37Conceda a nus, han ei detg, da seser en tia gloria in da tia vart dretga e l’auter da tia vart seniastra. 38Jesus ha detg ad els: Vus saveis buca tgei che vus dumandeis. Pudeis vus beiber il calisch che jeu vegn a beiber e vegnir battegiai cul batten che jeu retscheivel? 39Ei han rispundiu: Gie, nus pudein. Jesus ha detg ad els: Il calisch che jeu beibel vegnis vus a beiber, e cul batten che jeu retscheivel vegnis vus battegiai. 40Mo da seser da mia vart dretga ni seniastra, gliez ei buca mia caussa da conceder, gliez auda a tgi ch’igl ei destinau.
41Ils diesch auters che vevan udiu quei ein sevilentai sur da Giachen e Gion. 42Havend clamau neutier els, ha Jesus detg: Vus saveis che quels che valan per regents dils pievels dicteschan da surengiu e ch’ils gronds laian sentir il pievel lur pussonza. 43Denter vus denton duei ei buc esser aschia. Il cuntrari: Quel che vul esser gronds denter vus, duei esser vies survient, 44e quel che vul esser igl emprem denter vus, seigi il fumegl da tuts. 45Pertgei era il Fegl dil carstgaun ei buca vegnius per esser survius, mobein per survir e dar sia veta sco prezi da spindrament per biars.
