da sora Maria Vincenz
Il text biblic dalla dumengia dad oz s’occupescha cun la damonda digl ir entuorn endretg cun la lescha ed ils condaments. Provocau quella damonda ha in conflict denter ils farisès ed ils giuvnals. Ils giuvnals han magliau la tschavera cun mauns malmunds! Per ils farisès e mussaders dalla lescha era quei inacceptabel. Jesus perencunter va entuorn detg liber cun l’interpretaziun da lescha e camond. Leschas vegnan interpretadas dils carstgauns sin lur moda e maniera. Jesus citescha il profet Jesaja: «... quei pievel undrescha mei cun las levzas ... las ductrinas ch’ei propagheschan ei nuot auter che prescripziuns da carstgauns» (cf. Jes 29,13), pia enzatgei fetg exteriur. Per quei di Jesus fetg serius: «Vus metteis d’ina vart il camond da Diu e setenis vid la tradiziun da carstgauns» (Mc 7,8). Ed el fa attents ils auditurs da gliez temps ed era nus, che buca quei che nus magliein fa nus malmunds, mobein quei che sortescha da nies intern: Patratgs nauschs ...
Buca las leschas ein impurtontas – mobein la carezia e la relaziun tier Diu, las qualas ein sesentas el cor dil carstgaun! Quella vart positiva digl evangeli dad oz duei vegnir accentuada specialmein oz el survetsch divin. La carezia e la relaziun tier Diu ein medemamein sesentas en nies cor! Quellas ein nossas directivas.
Mc 7,1–8.14–15.21–23
1Ils farisès ed enzacons mussaders dalla lescha ein vegni da Jerusalem e seradunai tier el. 2Ei han viu ch’entgins da ses giuvnals han priu lur tschavera cun mauns malmunds, quei vul dir cun mauns buca lavai.
3Ils farisès numnadamein e tut ils Gedius maglian buca senza ver lavau e furschau ils mauns, conform alla tradiziun dils vegls. 4E cura ch’ei retuornan dalla plazza publica, maglian ei buca avon che sespringir cun aua. Aunc biaras autras isonzas tegnan ei per tradiziun: Lavar ils buccals, ils ruogs e la vischala d’irom.
5Ils farisès e mussaders dalla lescha han pia dumandau Jesus: Pertgei setegnan tes giuvnals buca vid la tradiziun dils vegls, mobein prendan lur tschavera cun mauns malmunds? 6El ha rispundiu ad els: Jesaja ha veramein profetisau bein da vus simuladers, sco ei stat scret:
Quei pievel undrescha mei cun las levzas,
mo siu cor ei lunsch naven da mei.
7Adumbatten venereschan ei mei;
las ductrinas ch’ei propagheschan
ein nuot auter che prescripziuns da carstgauns.
8Vus metteis d’ina vart il camond da Diu e setenis vid la tradiziun da carstgauns.
14El ha clamau neutier il pievel ed ha detg ad els: Tedlei, mei tuts e prendei a cor! 15Buca quei che vegn d’ordeifer el carstgaun po far malmunds el, mobein quei che sortescha dil carstgaun, gliez fa malmunds il carstgaun.
21Pertgei ord igl intern, ord il cor dils carstgauns, vegnan ils nauschs patratgs: Pitinem, enguladetschs, mazzaments, 22adulteris, ranveria, nauschadad, malignadad, veta lischada, scuidonza, disfamaziuns, luschezia e malraschuneivladad. 23Tut quellas schliatadads vegnan ord igl intern e fan malmunds il carstgaun.
