da sur Martin Bearth
Suenter la miracla culs pauns e culs pèschs ei Jesus navigaus a Cafarnaum da l’autra vart dil lag. Il pievel che Jesus veva spisgentau il di avon ha puspei fom e spetga ch’el detti ussa paun ad els. Mo Jesus di: «Jeu sun il paun dalla veta. Tgi che maglia mei vegn a viver entras mei» (cf. Gn 6,51). Quels plaids da Jesus han biars da ses giuvnals buca capiu, han priu scandel e bandunau el. Sinaquei damonda Jesus ils auters: «Leis era vus ir naven?» (Gn 6,67). La risposta da Simon Pieder fa surstar: «Segner, tier tgi duein nus ir? Ti has plaids da veta perpetna. Nus vein cartiu e savein: Ti eis il Sogn da Diu» (Gn 6,68s). Gie, Segner, tier tgi duein era nus dad oz ir, cu bia ei per nus nuncapeivel e stgir e grev? Ti has plaids che dattan veta e speronza, per ussa e per adina.
Gn 6,60–69
60Udend quei, han biars da ses giuvnals detg: Ses plaids ein dirs, tgi po tedlar els? 61Savend Jesus che ses giuvnals murmignavan pervia da quei, ha el emparau els: Prendeis vus scandel da quei? 62Tgei pér lu, cu vus veseis il Fegl dil carstgaun ad ascender leu, nua ch’el fuva avon? 63Il spért ei quel che dat veta; la carn vala nuot. Ils plaids che jeu hai detg a vus ein spért e veta. 64Denter vus ein denton enzacons che creian buc. Jesus saveva gie d’entschatta enneu tgi che creigi buc e tgeinin che vegni a tradir el. 65Ed el ha cuntinuau: Perquei hai jeu detg a vus: Negin sa vegnir tier mei, sch’igl ei buca dau ad el dil Bab.
66Da cheu naven ein biars da ses giuvnals seretratgs ed han buca cumpignau el pli. 67Cheu ha Jesus detg als dudisch: Leis era vus ir naven? 68Simon Pieder ha dau per risposta: Segner, tier tgi duein nus ir? Ti has plaids da veta perpetna. 69Nus vein cartiu e savein: Ti eis il Sogn da Diu.
