da sur Marcus Flury
Per la tiarza gada va ei en quei evangeli per la multiplicaziun dil paun e per l’interpretaziun entras Jesus. «Jeu sun il paun vivent ch’ei vegnius giu da tschiel» (Gn 6,41). Igl ei capeivel ch’ils contemporans da Jesus han giu breigia da capir ed acceptar che quel che vala sco fegl da Giusep e Maria duei vegnir giu da tschiel. In access a quella verdad san ins mo anflar entras la cardientscha en Diu ch’ei era in regal da Diu.
Jesus porscha buca mo nutriment pil tgierp (multiplicaziun dil paun), mobein oravontut per l’olma. El dat a nossa veta orientaziun, in senn e profunditad. Nus astgein viver da quei paun ch’el dat e ch’el ei sez. El ha eligiu quella sempla enzenna dil paun, per mussar a nus ch’el vul dar a nus tut quei che nus duvrein per viver. «Tgi che maglia da quei paun, vegn a viver en perpeten» (Gn 6,51). Magliar vul dir internisar, schar daventar ei ina part da mei. Jesus duei sco in nutriment daventar ina part da mei ed aschia regalar a mi forza e vera veta.
Gn 6,41–51
41Ussa han ils Gedius enschiet a murmignar sur dad el, perquei ch’el veva detg: Jeu sun il paun ch’ei vegnius giu da tschiel. 42Ed els han detg: Ei quei buca Jesus, il fegl da Giusep; enconuschein nus buca siu bab e sia mumma? Co sa el ussa dir: Jeu sun vegnius giu da tschiel? 43Jesus ha detg ad els: Buca murmignei in siper l’auter! 44Negin sa vegnir tier mei, sch’il Bab che ha tarmess mei muenta buc el; e jeu vegn a leventar el il giuvenessendi. 45Els profets stat ei scret: E tuts vegnan ad esser instrui da Diu; scadin che ha novas dil Bab ed ha empriu dad el, vegn tier mei. 46Negin ha viu il Bab dano quel che vegn neu da Diu, lez ha viu il Bab. 47Pilver, pilver, jeu ditgel a vus: Tgi che crei, ha veta perpetna.
48Jeu sun il paun dalla veta. 49Vos perdavons han magliau il manna el desiert ed ein morts. 50Quei denton ei il paun che vegn giu da tschiel; tgi che maglia da quel, vegn buc a murir. 51Jeu sun il paun vivent ch’ei vegnius giu da tschiel. Tgi che maglia da quei paun, vegn a viver en perpeten. Ed il paun che jeu vegn a dar, ei mia carn per la veta dil mund.
