da Ramona Casanova-Baumgartner
Tier fiastas eis ei magari aschia ch’ils envidai portan sezs ina spisa per il buffet. Ed alla fin vonza pil pli ina pulita purziun.
Mo co ei quei stau cun la spisgentada dils 5000 che vevan fom? Ei tut vegniu mo dils tschun pauns e dils dus pèschs? Ha forsa il mattatsch intimau auters dad era contribuir il lur? Ni ha veramein l’oraziun da Jesus fatg daventar nundumbreivels ils pauns e pèschs?
Igl ei pli segir da ver ina reserva e prender igl emprem quei che vegn fatg amogna. Quei ei pli emperneivel e quietont. Mo Jesus dat ina viulta a quei secuntener. Ils fomentai vesan igl exempel da Jesus. Cheutras semida l’atmosfera, ils carstgauns sezs semidan. L’enzenna dalla spisgentada dils 5000 ei in’enzenna che arva ils cors.
En Tiara sontga dat ei a Tabgha ina baselgia dalla multiplicaziun dils pauns. In mosaic illustrescha la spisgentada dils 5000. Denton vesan ins denter ils dus pèschs mo quater pauns, enstagl da tschun pauns. Forsa ston ins dir: Sche ti vul capir e tschaffar l’enzenna dalla multiplicaziun dils pauns, stos ti sezs metter vitier in paun.
Gn 6,1–15
1Silsuenter ei Jesus ius vi sin l’autra riva dalla mar da Galilea ni da Tiberias. 2Ina gronda fuola suandava el, perquei ch’ei vesevan las enzennas ch’el fageva culs malsauns. 3Mo Jesus ei ius sil cuolm e sesius leu cun ses giuvnals. 4Pastgas, la fiasta dils Gedius, fuva damaneivel. 5Alzond l’egliada, ha Jesus viu che bia glieud vegneva tier el. Ed el ha detg a Filip: Nua lein cumprar paun, per che quels hagien da magliar? 6Quei ha el detg per metter Filip sill’emprova; el sez saveva numnadamein, tgei ch’el leva far. 7Filip ha rispundiu: Paun per duatschien denars tonscha buc, per che mintgin survegni era mo ina buccada. 8In da ses giuvnals, Andriu, il frar da Simon Pieder, ha detg ad el: 9Cheu ei in mattatsch che ha tschun pauns dumiec e dus pèschs; mo tgei ei quei per tons! 10Jesus ha detg: Fagei seser la glieud! En quei liug fuva ei bia pastg. Els ein pia sesi, entuorn tschunmelli umens. 11Lu ha Jesus priu ils pauns, ha plidau igl engraziament e distribuiu a quels che sesevan, medemamein era ils pèschs, ton sco ei han vuliu. 12Cura ch’els han giu avunda, ha el detg a ses giuvnals: Rimnei las vanzadiras, per che nuot mondi en mal! 13Els han rimnau ed empleniu dudisch canasters cun las buccadas dils tschun pauns dumiec che la glieud veva schau vanzar. 14Vesend l’enzenna che Jesus veva fatg, scheva la glieud: Quei ei pilver il profet che duei vegnir sil mund. 15Cheu ha Jesus encurschiu ch’ei levan vegnir e far el retg culla forza. Perquei eis el puspei seretratgs sin il cuolm, el tut persuls.
